ក្រសួងមហាផ្ទៃ ប្រមាន សម រង្ស៊ី ឲ្យទទួលខុសត្រូវចំពោះការធ្វើបាតុកម្ម
ភ្នំពេញ៖ នៅថ្ងៃទី០៨ ខែសីហា នេះ លោកឧបនាយករដ្ឋមន្រ្តី ស ខេង រដ្ឋមន្រ្តីក្រសួងមហាផ្ទៃ បានសរសេរលិខិតមួយច្បាប់ទៅលោក សម រង្ស៊ី ប្រធានគណបក្សសង្រ្គោះជាតិ ដោយប្រាប់មេដឹកនាំគណបក្សប្រឆាំងរូបនេះអំពីការទទួលខុសត្រូវ ចំពោះបាតុកម្ម ដែលលោក សម រង្ស៊ី គ្រោងនឹងដឹកនាំនៅពេលខាងមុខ ដើម្បីប្រឆាំងនឹងលទ្ធផលឆ្នោតនោះ។
លោកឧបនាយករដ្ឋមន្រ្តី ស ខេង បានគូសបញ្ជាក់ក្នុងលិខិតថា ការធ្វើបាតុកម្មដោយសន្តិវិធីដើម្បីទាមទារតវ៉ាលើបញ្ហាណាមួយ គឺជាសិទ្ធិសេរីភាពរបស់ប្រជាពលរដ្ឋដែលបានចែងក្នុងរដ្ឋធម្មនុញ្ញ នៃព្រះរាជាណាចក្រកម្ពុជា ប៉ុន្តែអ្នកដឹកនាំបាតុកម្ម និងបាតុករត្រូវគោរពនូវបទប្បញ្ញត្តិនានា នៃច្បាប់ស្តីពីការធ្វើបាតុកម្មដោយសន្តិវិធី។
លិខិតបន្តថា ក្នុងករណីការធ្វើបាតុកម្មបានបង្កឲ្យមានអំពើហិង្សា ការបំផ្លិចបំផ្លាញដល់សន្តិសុខជាតិ ការបំផ្លិចបំផ្លាញទ្រព្យសម្បត្តិសាធារណៈ ឬឯកជន និងសណ្តាប់ធ្នាប់សាធារណៈ អ្នកដឹកនាំធ្វើបាតុកម្ម និងអ្នកប្រព្រឹត្តបទល្មើស ត្រូវទទួលខុសត្រូវចំពោះមុខច្បាប់ អំពីផលវិបាកនានា ដែលកើតឡើងពីការធ្វើបាតុកម្មនោះ។
គួរបញ្ជាក់ដែរថា ក្នុងឱកាសដែលលោក សម រង្ស៊ី ប្រធានគណបក្សសង្រ្គោះជាតិ ចុះជួបសំណេះសំណាល និងថ្លែងអំណរគុណអ្នកគាំទ្រនៅតាមបណ្តាខេត្តមួយចំនួន ក៏ដូចជានៅរាជធានីភ្នំពេញ លោក សម រង្ស៊ី បានធ្វើការអំពាវនាវដល់ប្រជាពលរដ្ឋឲ្យចូលរួមធ្វើមហាបាតុកម្មតវ៉ា ចំពោះលទ្ធផលនៃការបោះឆ្នោតជ្រើសតាំងតំណាងរាស្រ្តអាណត្តិទី៥ ដែលលោកបានចាត់ទុកថា មានភាពមិនប្រក្រតី និងក្លែងបន្លំ។ ប៉ុន្តែកាលបរិច្ឆេទពិតប្រាកដនៃការធ្វើបាតុកម្មនោះ លោក សម រង្ស៊ី មិនទាន់បានបញ្ជាក់ឲ្យច្បាស់លាស់នៅឡើយទេ៕ Cambodia News