ប្រមុខរដ្ឋាភិបាលហាមប្រជាពលរដ្ឋពិសាគ្រឿងស្រវឹងមុនថ្ងៃបោះឆ្នោត
លោក ស្វាយ ស៊ីថា ប្រធានអង្គភាពព័ត៌មាន និងប្រតិកម្មរហ័ស របស់ទីស្តីការគណៈរដ្ឋមន្ត្រី បានរម្លឹកទៅដល់សមាជិក សមាជិកា របស់អង្គភាពព័ត៌មាន និងប្រតិកម្មរហ័សទាំងអស់គ្នា ត្រូវចូលរួមគោរព និងអនុវត្តនូវសេចក្តីណែនាំ របស់រាជរដ្ឋាភិបាលកម្ពុជា ស្តីពី ការផ្អាកមិនឲ្យលក់ដូរ និងពិសារគ្រឿងស្រវឹង មួយថ្ងៃ មុនថ្ងៃបោះឆ្នោត និងនៅថ្ងៃបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៣ នាថ្ងៃអាទិត្យ ទី៣មិថុនា ឆ្នាំ២០១២ខាងមុខនេះ។
លោក ស្វាយ ស៊ីថា បានបន្តថា បម្រាមរបស់ប្រមុខរដ្ឋាភិបាលដូច្នេះ ដើម្បីរួមចំណែកទប់ស្កាត់អំពើហិង្សា ការគំរាមកំហែង ការបំភិតបំភ័យ និងបាតុភាពនានា ដែលអាចបណ្តាលមកជាយថាហេតុពីការពិសារគ្រឿងស្រវឹងគ្រប់ប្រភេទ។
ជាមួយគ្នានោះនៅព្រឹកថ្ងៃទី ៣១ ឧសភា ២០១២ នៅទីស្តីការគណៈរដ្ឋមន្ត្រី មុនកិច្ចប្រជុំប្រចាំថ្ងៃរបស់អង្គភាពព័ត៌មាន និងប្រតិកម្មរហ័ស ក៏បានធ្វើការផ្តាំផ្ញើដល់សមាជិក សមាជិការទាំងអស់របស់អង្គភាព ត្រូវទៅចូលរួមបោះឆ្នោតជ្រើសរើសក្រុមប្រឹក្សាឃុំ សង្កាត់ នៅថ្ងៃទី៣ ខែ មិថុនា ឆ្នាំ២០១២ ខាងមុខនេះ កុំបីអាក់ខាន ដើម្បីបំពេញកាតព្វកិច្ចជាប្រជាពលរដ្ឋ៕
