លោក ហ៊ុន សែន សន្យាដំឡើង ប្រាក់ខែជូន កម្មករ និងមន្ដ្រីរាជការ
កណ្ដាល ៖ នាឱកាសចុះជួយស្ទូងស្រូវ ប្រជាពលរដ្ឋនៅស្រុក ខ្សាច់កណ្ដាល នៅព្រឹកថ្ងៃទី០២ ខែសីហានេះ លោកនាយករដ្ឋមន្ដ្រី ហ៊ុន សែន បានមានប្រសាសន៍ថា នឹងខិតខំ ហើយជំរុញដំឡើងប្រាក់ខែកាន់ តែខ្ពស់ សម្រាប់កម្មករនៅតាមរោងចក្រ និងមន្ដ្រីរាជការ ។
សម្រាប់ការប្រកាសដោយសន្យារបស់ លោក ហ៊ុន សែន ខាងលើនេះប្រជាពលរដ្ឋមានជំនឿយ៉ាងពិតប្រាកដថា នឹង ទទួលបានការដំឡើងប្រាក់ខែជូនកម្មករ ក៏ ដូចជាមន្ដ្រីរាជការ ពីព្រោះគណបក្សប្រជា ជន ឱ្យតែសន្យាហើយ គឺធ្វើតែម្ដង មិនមែន សន្យាខ្យល់ របស់គណបក្សប្រឆាំងឡើយ។
លោកនាយករដ្ឋមន្ដ្រី ហ៊ុន សែន បានថ្លែងអំណរគុណចំពោះ ប្រជាពលរដ្ឋ ដែលបានបោះឆ្នោតជូនគណ បក្សប្រជាជន ដើម្បីឱ្យលោក ហ៊ុន សែន បន្ដដឹកនាំ ប្រទេសកម្ពុជា ហើយនឹងមានការរីកចម្រើន កាន់តែខ្លាំងឡើងថែមទៀត។
ជាមួយគ្នានោះ លោកនាយករដ្ឋមន្ដ្រី ហ៊ុន សែន អំពាវនាវ ឱ្យប្រជាពលរដ្ឋគ្រប់និន្នការនយោបាយទោះបោះឆ្នោតឱ្យគណបក្សណាក៏ដោយ គួរតែជានាគ្នាឡើងវិញ ដើម្បីបុព្វហេតុជាតិមាតុភូមិ នោះក៏ព្រោះតែរដូវបោះឆ្នោតបានកន្លងផុតទៅហើយ។ លោកក៏បានស្នើឱ្យប្រជាពលរដ្ឋ ត្រូវរាប់អាននិងស្រឡាញ់គ្នាឡើងវិញ និងកុំឱ្យមានការគុំគួន និងស្អប់ខ្ពើមគ្នា ទោះបីជាបានជ្រើសរើសបោះឆ្នោតឱ្យគណបក្សដែលខ្លួនស្រឡាញ់និងពេញ ចិត្តផ្សេងគ្នាក៏ដោយ៕ នាង/Cambodia News
