ផលវិបាកនៃអំពើហិង្សាក្នុងគ្រួសារ
ដោយ ផល សុវណ្ណវត្តី
Cambodia News
នៅក្នុងសង្គមកម្ពុជានាពេលបច្ចុប្បន្ន អំពើហិង្សាក្នុងគ្រួសារនៅតែជាបញ្ហាចោទ ដែលធ្វើឲ្យអន្តរាយ ហើយបានបន្ទុចបង្អាក់ការអភិវឌ្ឍ និងសេចក្តីសុខ សុភមង្គលនៅក្នុងគ្រួសារផង និងនៅក្នុងសង្គមជាតិផង។
ស្ទើរតែជារៀងរាល់ថ្ងៃ ដែលសារព័ព៌មានក្នុងស្រុកបានចុះផ្សាយពីបញ្ហាអំពើហិង្សាក្នុងគ្រួសារ ដែលក្នុងនោះមានប្តីវាយប្រពន្ធ ឪពុក វាយកូន ពេលខ្លះ ប្រពន្ធកាប់ប្តី កូនសម្លាប់ឪពុក។ល។ និង។ល។ ដែលនាំសមាជិកគ្រួសារខ្លះបានធ្លាក់ខ្លួនពិការ បាត់ បង់ កម្លាំង ពលកម្ម និងបាត់បង់ជីវិតក៏មាន ហើយអ្នកដែលបង្ករបួសស្នាមក៏បានទទួលរងការចោទប្រកាន់ពីច្បាប់ព្រហ្មទណ្ឌ ដែលនាំឲ្យជាប់ពន្ធនាគារ។ ទាំងនេះសុទ្ធតែជាបន្ទុករបស់សង្គម។
កន្លងមក រាជរដ្ឋាភិបាល និងអង្គការសង្គមស៊ីវិល ដោយមានអង្គការ Trocaire ផងបានខិតខំជួយផ្សព្វផ្សាយ និងបង្កើនការយល់ដឹងពីផលវិបាកដែលបណ្តាលមកពីអំពើហិង្សាក្នុងគ្រួសារតាមរយៈការអប់រំដោយផ្ទាល់ផង និងដោយប្រយោលផង។ កាលពីដើមឆ្នាំ ២០១២ នេះ អង្គការ Trocaire បានជួយបណ្តុះបណ្តាលដល់អ្នកសារព័ត៌មានទាំងផ្នែកបោះពុម្ព ទាំងវិទ្យុ និងតាមគេហទំព័រ និងក្រុមនិសិត្សសារព័ត៌មានចំនួន ១៥ នាក់ ដើម្បីឲ្យពួកគេជួយផ្សព្វផ្សាយព័ត៌មានដល់សាធារណជនពីផលវិបាកដែលបណ្តាលមកពីការប្រើអំពើហិង្សាក្នុងគ្រួសារ។
លោកស្រី រស់ សុភាពនាយិកាប្រតិបត្តិនៃអង្គការ យេនឌ័រ និងអភិវឌ្ឍន៍ដើម្បីកម្ពុជា មានធ្លាប់បានប្រសាសន៍ថា ការប្រើប្រាស់អំពើហឹង្សារវាងបី្ត និងប្រពន្ធ ការប្រើប្រាស់អំពើហឹង្សាក្នុងគ្រួសារគឺវាខុសទាំងស្រុងហើយ ប៉ុន្តែត្រូវអាស្រ័យទៅលើច្បាប់អំពើហឹង្សា និងកិច្ចការពារជនរងគ្រោះ ទើបគិតទៅដល់ច្បាប់ក្រមព្រហ្មទណ្ឌ។
លោកស្រី បានបញ្ជាក់ថា ការប្រព្រឹត្តអំពើហិង្សាក្នុងគ្រួសារពេលខ្លះ នាំឲ្យសមាជិកក្នុងគ្រួសារបានបឹ្តងផ្តល់គ្នា ដែលនាំឲ្យខាតពេលវាលាក្នុងការងារ និងការប្រកបមុខរបរផ្សេងៗ ហើយប្រសិនបើគ្រួសារណាមានឪពុកម្តាយ ឬក៏អាណាព្យាបាលស្ថិតក្នុងស្ថានភាពនេះ គឺអាចបណ្តាលឲ្យកូនៗមានអារម្មណ៍មិនល្អ ដែលវានាំឲ្យប៉ះពាល់ដល់ការសិក្សារៀនសូត្ររបស់ពួកគេ។
លោកស្រីបានបន្ថែម ការប្រើប្រាស់អំពើហឹង្សាក្នុងគ្រួសារគឺនាំឲ្យខាតបង់ ដោយលោកស្រីទទូចថា ប្រសិនបើមានបញ្ហាគូជម្លោះដែលជាសមាជិកក្នុងគ្រួសារត្រូវតែចេះអត់ធ្មត់ និងរកវិធីដោះស្រាយដោយសន្តិវិធីជាជាងការប្រើហិង្សា។
អ្នកបំពេញការងារអប់រំស្តីពីការទប់ស្កាត់អំពើហិង្សាក្នុងគ្រួសារបានឲ្យដឹងថា អំពើហិង្សាក្នុងគ្រួសារមិនមែនមានតែលើផ្លួវកាយនោះទេ តែក៏មានហិង្សារផ្លួវចិត្ត និងផ្នែកសេដ្ឋកិច្ចផងដែរ៕ (អត្ថបទនេះសរសេរឡើងក្រោមការគាំទ្រពីអង្គការ Trocaire) ២៨ ឧសភា ឆ្នាំ ២០១២)
