គណបក្សប្រឆាំងត្រៀមធ្វើបាតុកម្មធំតវ៉ាចំពោះលទ្ធផលឆ្នោត
ភ្នំពេញ៖ មេដឹកនាំគណបក្សប្រឆាំងក្នុងប្រទេសកម្ពុជា បានប្រាប់ទៅអ្នកគាំទ្រខ្លួននៅខាងមុខទីស្នាក់ការក្នុងសង្កាត់ ចាក់អង្រែថា គណបក្សនេះនឹងត្រៀមធ្វើបាតុកម្មធំនៅទូទាំងប្រទេស ប្រសិនបើមិនមានការទទួលស្គាល់ថា គណបក្សសង្រ្គោះជាតិឈ្នះការបោះឆ្នោតលើកនេះនោះទេ។
លោក សម រង្ស៊ី ប្រធានគណបក្សសង្រ្គោះជាតិបានថ្លែងថា គណបក្សសង្រ្គោះជាតិ គឺពិតជាគណបក្សដែលបានឈ្នះក្នុងការបោះឆ្នោតជ្រើសតាំងតំណាង រាស្រ្តអាណត្តិទី៥ ដែលបានប្រព្រឹត្តទៅកាលពីថ្ងៃទី២៨ ខែកក្កដា។ ជាមួយគ្នានេះលោក សម រង្ស៊ី បានប្រាប់ដល់អ្នកគាំទ្រឲ្យបញ្ជូនសារតគ្នានៅលើបណ្តាញសង្គម អំពីគម្រោងនៃការធ្វើបាតុកម្មនោះ។
ប៉ុន្តែបើតាមលោក កឹម សុខា គណបក្សប្រឆាំងនឹងទុកពេល១ខែយ៉ាងយូរ ដើម្បីឲ្យមានការស្រាវជ្រាវពីភាពមិនប្រក្រតីនានានៅក្នុងការ បោះឆ្នោតដែលរៀបចំដោយ គ.ជ.ប៕ Cambodia News