កម្មករស៊ិនទ្រីធ្វើបាតុកម្មក្នុងថ្ងៃឃោសនាបោះឆ្នោតចុងក្រោយ
ភ្នំពេញ៖ កម្មករស៊ិនទ្រីរាប់រយនាក់ បានធ្វើបាតុកម្ម នៅខាងមុខក្រុមហ៊ុនស៊ិនទ្រីក្នុង សង្កាត់ ដង្កោ ខណ្ឌដង្កោ នាថ្ងៃ ទី២៦ ខែកក្កដា ជាថ្ងៃឃោសនាបោះឆ្នោតចុងក្រោយ ដើម្បីទាមទារបើកប្រាក់ខែ សម្រាប់ធ្វើដំណើរទៅបោះឆ្នោតនៅឯស្រុកកំណើត។
បើតាមសម្ដីរបស់លោក ប្រាក់ សុខា តំណាងកម្មករនៅក្នុងក្រុមហ៊ុន ស៊ិនទ្រីបានឲ្យដឹងថាក្រុមហ៊ុនបើកប្រាក់ខែ ឲ្យតែអ្នកដែលធ្វើការពេលយប់ ប្រមាណជាង១៨០នាក់ តែមិនព្រមបើកប្រាក់ខែ ឲ្យកម្មករ ដែលធ្វើការពេលថ្ងៃ ដោយក្រុមហ៊ុនប្រាប់ថា ឲ្យប្រាក់ខ្ចីសម្រាប់ធ្វើដំណើរទៅបោះឆ្នោតនៅឯស្រុកកំណើត។
ជាធម្មតាកម្មករ ប្រមាណជា ១២០០ នាក់ តែងតែទទួលបានប្រាក់ខែព្រមគ្នានៅ ថ្ងៃទី ២៨ ទៅ ២៩ តែដោយសារតែចំពេលបោះឆ្នោត ហើយកម្មករត្រូវការបើកប្រាក់ខែមុនថ្ងៃឈប់សម្រាកទៅបោះឆ្នោត តែក្រុមហ៊ុនមិនព្រមបើកប្រាក់ខែឲ្យទើបបណ្ដាលឲ្យមានការធ្វើបាតុកម្មនេះឡើង។
បើសិនជាក្រុមហ៊ុននៅតែមិនព្រម បើកប្រាក់ខែឲ្យកម្មករ ទេនោះកម្មករនឹងមិនព្រមធ្វើការ ហើយអាចធ្វើឲ្យមានផលប៉ះពាល់ដល់បរិស្ថានជុំវិញទីក្រុងភ្នំពេញយ៉ាងធ្ងន់ធ្ងរ។
បើតាមសម្តីរបស់លោក សុខ ចាន្នី ដែលជាកម្មករ មកពី ខេត្តកំពង់ចាម បានឲ្យដឹងថា ក្រុមហ៊ុនសន្យាថា នឹងបើកប្រាក់ខែឲ្យពួកគាត់នៅម៉ោង ៣រសៀលនេះ តែមិនទាន់ឃើញបើក ឲ្យនៅឡើយ។លោក បានបន្ត « បើគេព្រមបើកឲ្យទើប ពួកខ្ញុំព្រមធ្វើការបន្ត។»
កម្មករភាពច្រើនសុទ្ធតែត្រូវទៅបោះឆ្នោតនៅតាមបណ្ដាខេត្តឆ្ងាយៗ ដូចជា កំពង់ចាម រតនគិរី ស្ទឹងត្រែង ហើយបើពួកគេនៅតែមិនទទួលបានប្រាក់ខែ នោះពួកគេមិនអាចធ្វើដំណើរទៅបោះឆ្នោតបានឡើយ។
បើតាមសម្ដីរបស់ ខៀវ វណ្ណ អាយុ ២៨ឆ្នាំ ដែលជាកម្មកានី «ខ្ញុំគ្រាន់តែចងបានលុយ ទៅស្រុកកំណើតទៅបោះឆ្នោត ខ្ញុំជាកូនខ្មែរ ខ្ញុំចងទៅបោះឆ្នោត ព្រោះសន្លឹកមួយសន្លឹកមានប្រយោជន៍ណាស់។»
បើតាមសម្ដីរបស់លោក ទូច ចំរើន ដែលជានាយករងរបស់ក្រុមហ៊ុនបានឲ្យដឹងថា ការបើកប្រាក់ខែឲ្យកម្មករមិនមានការយឺតយាវទេព្រោះជាធម្មតាតែងតែបើនៅថ្ងៃទី ២៧ ២៨ឬក៏២៩ឯនោះ។
ទោះជាយ៉ាងណាក៏ដោយរហួតមកដល់ម៉ោងជាង ៤រសៀលទើបកម្មករទទួលបានប្រាក់ខែដែលពួកគេកំពុងរងចាំ តាំងពីព្រឹកព្រលឹម។
បើតាមសេចក្ដីប្រកាសពត័មានរបស់ក្រសួងការងារ និងបណ្ដុះបណ្ដាលវិជ្ជាជីវៈ បានអនុញ្ញាតឲ្យកម្មករទទួលបានការឈប់សម្រាក ៣ថ្ងៃ ហើយក្រុមហ៊ុន ឬក៏ស្ថាប័ននានា តម្រូវឲ្យបើកប្រាក់ឲ្យកម្មករមុនថ្ងៃឈប់សម្រាកទៅបោះឆ្នោត៕ ដោយ បេឡា/Cambodia News
