Snowden បានទទួលលិខិតស្នាមចេញពីព្រលានយន្តហោះមូស្គូ
ស្ថានភាព ជាប់កុនរបស់អតីតភ្នាក់ងារ ស៊ើបការណ៍អាមេរិក Edward Snowden ឈានមកដល់មាត់ច្រកនៃដំណោះស្រាយហើយ ព្រោះ អាជ្ញាធររុស្ស៊ីដែលបានទទួលពាក្យសុំជ្រកកោនបណ្តោះអាសន្ន កាលពីសប្តាហ៍មុន ទំនងបានចេញលិខិតអនុញ្ញាត ឱ្យSnowden ចាកចេញពីព្រលានយន្តហោះក្រុងម៉ូស្គូ នៅល្ងាចថ្ងៃពុធនេះ។
បើ តាមប្រភពព័ត៌មានReuters អតីតភ្នាក់ងារស៊ើបការណ៍ ដែលសំងំលាក់ខ្លួន ក្នុងដែនដីអន្តរជាតិនៃព្រលានយន្តហោះក្រុងម៉ូស្គូ គេចពីការតាមចាប់របស់សហរដ្ឋអាមេរិក តាំងពីជាងមួយខែមកហើយនោះ កំពុងត្រៀមខ្លួនមានសេរីភាពចេញដើរហើរ ក្នុងទឹកដីរុស្ស៊ី។
ប៉ុន្តែគេនៅមិនទាន់ដឹងថាតើ Snowden ត្រូវស្នាក់នៅទីណា ឬនៅកន្លែងណាពិតប្រាកដទេ។ មេធាវីរបស់ស្នូឌិន ដែលធ្វើមកព្រលានយន្តហោះដើម្បីបំពេញបែបបទនាំSnowdenចេញ មិនព្រមធ្វើអត្ថាធិប្បាយអ្វីទាំងអស់ មុនជំនួបជាមួយកូនក្តី។ សូម្បីតែអ្នកទទួលខុសត្រូវវីគីលីក ដែលធ្លាប់ដើរតួនាទីយ៉ាងសស្រាក់ សស្រាំការពារអតីតភ្នាក់ងារសម្ងាត់ អាមេរិករូបនេះ ក៏បដិសេធមិនបញ្ចេញមតិយោបល់អ្វីដែលក្នុងពេលនេះ។
បើតាមច្បាប់អន្តោប្រវេសន៍រុស្ស៊ី លិខិតអនុញ្ញាតឱ្យ Snowden ចាកចេញពីព្រលានយន្តហោះ នេះបណ្ណបញ្ជាក់ថាបានទទួលពាក្យសុំសិទ្ធិជ្រកកោនប៉ុណ្ណោះ តែក្នុងពេលរង់ចាំសេចក្តីសម្រេច ម្ចាស់បណ្ណនេះ អាចរស់នៅ និង ធ្វើដំណើរដោយសេរីលើទឹកដីរុស្ស៊ី។
Snowden ងាកមកសុំសិទ្ធិជ្រកកោនបណ្តោះអាសន្ននៅរុស្ស៊ី ព្រោះគ្មានមធ្យោបាយធ្វើដំណើរទៅកាន់ប្រទេសវេណេស៊ុយអេឡា ប៉ុន្តែបើតាមមេធាវីពេលនេះ Snowden ទំនងជាប្តូរចិត្តវិញ ហើយអាចនឹងសុំសញ្ជាតិរុស្ស៊ីផង។
សំណុំរឿងSnowden នេះ បានធ្វើរុស្ស៊ី ទើសទាល់យ៉ាងខ្លាំង ព្រោះមិនចង់ឱ្យមានភាពល្អក់កករបន្ថែមទៀតជាមួយនឹងសហរដ្ឋអាមេរិក ដែលបន្តដាក់គំនាបលើរុស្ស៊ី និងទាមទារឱ្យមូស្គូធ្វើបត្យាប័ន Snowden ទៅអាមេរិកដើម្បីទទួលទោសពីបទទម្លាយព័ត៌មានសម្ងាត់ជាតិ។ លោកប្រធានាធិបតីពូទីន ក៏បានសម្តែងការប្រុងប្រយ័ត្នខ្លាំង ដោយបានដាក់លក្ខខណ្ឌជាមុនដល់ Snowden ឱ្យបញ្ឈប់សកម្មភាពនេះ បើចង់នៅលើដីរុស្ស៊ី៕ដោយ អៀង សុខម៉ិញ (RFI)
