បក្សនយោបាយធ្វើការដង្ហែក្បួនឃោសនាទ្រង់ទ្រាយធំថ្ងៃនេះ
ភ្នំពេញ៖ នៅថ្ងៃទី២៦ ខែកក្កដា ឆ្នាំ២០១៣នេះ ជាថ្ងៃបិទបញ្ចប់នៃយុទ្ធនាការឃោសនារកសំឡេងឆ្នោតសម្រាប់ ការបោះឆ្នោតជ្រើសតាំងតំណាងរាស្រ្តអាណត្តិទី៥ គណបក្សនយោបាយនានាដែលចូលរួមក្នុងការបោះឆ្នោត បានប្រកាសហើយថា ពួកគេនឹងធ្វើការហែរក្បួនឃោសនាជាទ្រង់ទ្រាយធំនៅថ្ងៃនេះដែរ។
សម្រាប់គណបក្សប្រជាជនកម្ពុជា ដែលជាគណបក្សមានស្ទុះគាំទ្រខ្លាំងជាងគេ នៅថ្ងៃនេះនឹងរៀប ចំក្បួនដង្ហែដ៏ធំនៅក្នុងទីក្រុងភ្នំពេញ ក៏ដូចជាតាមបណ្តាខេត្តនានាដោយមានមនុស្សចូលរួមរាប់ម៉ឺននាក់។
ចំណែកគណបក្សសង្រ្គោះជាតិ ដែលជាគណបក្សប្រឆាំង នៅព្រឹកនេះនឹងរៀបចំក្បួនហែរទ្រង់ ទ្រាយធំនៅខេត្តកំពង់ចាម បន្ទាប់មកនៅពេលរសៀលនឹងធ្វើការហែរក្បួនធំក្នុងរាជធានីភ្នំពេញ ដោយមានមនុស្សចូលរួមរាប់ម៉ឺននាក់ដូចគ្នា។
មិនខុសពីគណបក្សធំៗទាំងពីរនេះ សម្រាប់គណបក្សហ៊្វុនស៊ិនប៉ិច នៅរសៀលនេះ ក៏មានការដង្ហែក្បួនទ្រង់ទ្រាយធំផងដែរ ដោយចាប់ដង្ហែចេញពីក្រុងតាខ្មៅ ខេត្តកណ្តាល ឆ្ពោះមកកាន់រាជធានីភ្នំពេញ ក្រោមការដឹកនាំរបស់សម្តេចរាជបុត្រី នរោត្តម អរុណរស្មី ប្រធានគណបក្សនេះ។
ក្នុងយុទ្ធនាការឃោសនាថ្ងៃចុងក្រោយនេះ ប្រាដកណាស់ផ្លូវនានាក្នុងរាជធានីភ្នំពេញពិតជាមានការកកស្ទះ ប៉ុន្តែទោះជាយ៉ាងណាក៏ដោយ ដើម្បីជួយសម្រួលដល់ការកកស្ទះនេះ សាលារាជធានីភ្នំពេញ ក៏បានចេញបញ្ជាមួយដែរកាលពីថ្ងៃម្សិលមិញ ដោយហាមឃាត់រាល់រថយន្តធំដឹកទំនិញទាំងអស់ មិនឲ្យចូលរាជធានីភ្នំពេញឡើយចាប់ពីម៉ោង៥ព្រឹក រហូតដល់ម៉ោង១២យប់ថ្ងៃទី២៦ ខែកក្កដានេះ៕ Cambodia News
