លោក សម រង្ស៊ី នៅតែអាចក្លាយជាអ្នកតំណាងរាស្រ្តនីតិកាលទី៥
លិខិតរបស់មិត្តអ្នកអាន
ទំព័រសម្រាប់អ្នកសារព័ត៌មានប្រជាពលរដ្ឋ
លោក សម រង្ស៊ី ដែលមុនថ្ងៃទី១២ ខែកក្កដា ឆ្នាំ២០១៣ ត្រូវបានតុលាការសម្រេចផ្តន្ទាទោសដាក់ពន្ធនាគារ មិនអាចសុំចុះបញ្ជីឈ្មោះជាបេក្ខជនតំណាងរាស្រ្តរបស់គណបក្សសង្រ្គោះជាតិបាន។ ប៉ុន្តែនៅថ្ងៃទី១២ ខែកក្កដា ឆ្នាំ២០១៣ លោក សម រង្ស៊ី ត្រូវបានព្រះករុណាជាអម្ចាស់ជីវិតលើត្បូង ព្រះមហាក្សត្រនៃព្រះរាជាណាចក្រកម្ពុជា សព្វព្រះរាជហឫទ័យប្រោសព្រះរាជទាននូវការលើកលែងទោស។ ការលើកលែងទោសនេះ ក៏ទទួលបាននូវការសាទរពីគ្រប់ទឹសទី ហើយលោក សម រង្ស៊ី ក៏បានត្រលប់មកប្រទេសកម្ពុជា នៅថ្ងៃទី១៩ ខែកក្កដា។
ថ្វីត្បិតតែយ៉ាងដូច្នេះក្តី បញ្ហាមិនចប់ត្រឹមនេះទេ។ គណបក្សសង្រ្គោះជាតិ អង្គការសង្គមស៊ីវិល អ្នកវិភាគនយោបាយ និងអ្នកពាក់ព័ន្ធទាំងអស់បានបង្ហាញទស្សនៈ ចង់ឃើញ លោក សម រង្ស៊ី បានចូលរួមឲ្យបានពេញលេញក្នុងការបោះឆ្នោត ដូចជាមានសិទ្ធិបោះឆ្នោត និងចុះបញ្ជីបេក្ខជនឈរឈ្មោះ ក្នុងការបោះឆ្នោតជ្រើសតាំងតំណាងរាស្រ្តនីតិកាលទី៥ ឆ្នាំ២០១៣ នៅមណ្ឌលកណ្តាល។ បើតាមការឆ្លើយតបរបស់ថ្នាក់ដឹកនាំ គ.ជ.ប គឺមិនអាចធ្វើបានទេ ដោយផ្អើកលើកក្តាផ្លូវច្បាប់ ហើយនីតិវិធីនៃការចុះបញ្ជីគណបក្ស និងបញ្ជីបេក្ខជនក៏បានចប់សព្វគ្រប់ហើយដែរ។
ប៉ុន្តែបញ្ហានេះនៅតែអាចដោះស្រាយបាន បន្ទាប់ពីការបោះឆ្នោតរួច។ ការដោះស្រាយដោយ យកមណ្ឌលណាមួយ ដែលគណបក្សសង្រ្គោះជាតិទទួលបានលទ្ធផលឆ្នោត ១អាសនៈយ៉ាងតិច មកធ្វើការពិចារណាដើម្បីផ្លាស់ប្តូរភ្លាមៗ បន្ទាប់ពីការបោះឆ្នោតរួច (មុនពេលប្រកាសសុពលភាព សមាជិករដ្ឋសភានីតិកាលទី៥)។ ប្រការនេះអាចអនុវត្តទៅបាន លុះត្រាតែបេក្ខជន ដែលបានជាប់ឆ្នោតក្នុងមណ្ឌលណាមួយនោះ ស្ម័គ្រចិត្តលៈបង់តំណែង ហើយបេក្ខជនលេខរៀងបន្ទាប់ដ៏ទៃទៀត ទាំងពេញសិទ្ធិ និងបំរុងទាំងអស់ ក៏ស្ម័គ្រចិត្តលៈបង់តំណែង រឺលាឈប់ពីគណបក្ស (អាចលាឈប់ ជាបណ្តោះអាសន្ន រឺលាឈប់ជានិមិត្តរូប)។ ដូច្នេះនៅក្នុងមណ្ឌលមួយនេះ ពិតជាគ្មានមនុស្ស (បេក្ខជន) ដើម្បីទទួលតំណែងជាតំណាងរាស្រ្តទេ។ ដើម្បីបំពេញតំណែងដែលទំនេរ ហើយគ្មាន មនុស្ស(បេក្ខជន)ទទួល គឺចាំបាច់ត្រូវតែតម្រូវឲ្យគណបក្សសាមី ដែលទទួលបានអាសនៈ រកមនុស្ស (បេក្ខជន)មកជំនួស ដោយការរៀបចំបញ្ជីបេក្ខជនជាថ្មី សម្រាប់មណ្ឌលណាដែលជួបករណីបេក្ខជនទាំងអស់ (ទាំងពេញសិទ្ធិ ទាំងបំរុង) លាឈប់ពីបក្ស (រត់ចោលជួរ)។ គណបក្សសង្រ្គោះជាតិ អាចស្នើបេក្ខជនថ្មី ដោយមានឈ្មោះលោក សម រង្ស៊ី ជាការស្រេច បន្ទាប់ពីលោក សម រង្ស៊ី បានចុះឈ្មោះបោះឆ្នោតរួច៕ ដោយៈ ប៉ែន សង្ហា
អត្ថបទនេះមិនឆ្លុះបញ្ជាំងពីទស្សនៈរបស់ Cambodia News ទេ