វិទ្យាស្ថានសន្ទនាមេគង្គ បង្កើតឡើងដើម្បីលើកកម្ពស់សន្តិភាព
Cambodia News/
ភ្នំពេញ៖ កាលពីល្ងាចថ្ងៃទី១៨ ខែកក្កដា នៅសណ្ឋាគារអាយខន វិទ្យាស្ថានសន្ទនាមេគង្គ បានត្រូវប្រកាសបង្កើតឡើងជាលើកដំបូងនៅកម្ពុជា ក្នុងគោលបំណងប្រមូលផ្តុំសហគមន៍ទាំងអស់ ដើម្បីបង្កើននូវការចេះអាណិតអាសូរ និងអត់អោនដល់គ្នា ការសហប្រតិបត្តិការភាពជាដៃគូ និងសេវាកម្មសហគមន៍ តាមរយៈការសន្ទនា
លោក ហាខាន់ អាតាសិវេរ៍ (Hakan Atasever) នាយកប្រតិបត្តិវិទ្យាស្ថានសន្ទនាមេគង្គ Mekong Dialogue Institute(MDI) បានថ្លែងក្នុងពិធីលៀងសាយភោជន៍ជាមិត្តភាពជាមួយអ្នកសារព័ត៌មានជិត ២០នាក់ ថា វិទ្យាស្ថានសន្ទនាមេគង្គ គឺជាវិទ្យាស្ថានដែលមិនស្វែងរកអត្ថប្រយោជន៍អ្វីទាំងអស់ ហើយត្រូវបានបង្កើតឡើងជាលើកដំបូងនៅប្រទេសកម្ពុជា ក្នុងឆ្នាំ២០១៣នេះ និងមានតែមួយគត់នៅលើពិភពលោកនេះ ក្នុងគោលបំណង គឺដើម្បីលើកកម្ពស់សន្តិភាព និងចូលរួមចំណែកជួយជ្រោមជ្រែងលើផ្នែកសហត្ថិភាពដល់អ្នកប្រកាន់ខ្ជាប់ សាសនា វប្បធម៌ ជាតិពន្ធ និងជាតិសាសន៍ផ្សេងៗគ្នា។
លោកបានមានប្រសាសន៍បន្តថា យើងជួយលើកកម្ពស់លើវិស័យអប់រំ ការពិភាក្សាជជែកវែកញែក និងការផ្លាស់ប្តូរព័ត៌មាន រួមទាំងបន្ថែមនូវគំនិតយោបល់ ដែលបង្ហាញនូវទស្សនៈយល់ឃើញផ្សេងៗគ្នា តាមដែលអាចមានក្នុងសកម្មភាពផ្សេងៗរបស់យើង ដូចជា ការសន្ទនា គំរោងនានារបស់សង្គម ការធ្វើសន្និសីទ ការអប់រំ ការស្រាវជ្រាវសិក្សាធិការ រង្វាន់សន្តិភាព និងកិច្ចសន្ទនា និងការប្រកួតប្រជែង
ក្នុងឱកាសនេះដែរ លោកប៉ែន សមិទ្ធិ ប្រធានក្លឹបអ្នកកាសែតកម្ពុជា បានមានប្រសាសន៍ថា « ក្នុងនាមក្លឹបអ្នកកាសែតកម្ពុជា និងអ្នកកាសែតកម្ពុជាទាំងអស់ដែលបានអញ្ជើញចូលរួមជាមួយវិទ្យាស្ថាន សន្ទនាមេគង្គ នាពេលនេះ សូមថ្លែងអំណរគុណយ៉ាងជ្រាលជ្រៅ ពីព្រោះវាមានសារសំខាន់ណាស់នៅក្នុងពិភពលោកយើងសព្វថ្ងៃនេះ»៕
