សម រង្ស៊ី មិនអាចចុះឈ្មោះបោះឆ្នោតបាន
Cambodia News/
ភ្នំពេញ៖ កាលពីព្រឹកថ្ងៃទី១៦ ខែកក្កដា មន្ត្រីជាន់ខ្ពស់នៃគណៈកម្មាធិការជាតិរៀបចំ ការបោះឆ្នោត (គ.ជ.ប.)បានបញ្ជាក់ថា លោក សម រង្ស៊ី ប្រធានគណបក្សសង្គ្រោះជាតិ ដែលទទួលបានការលើកលែងទោសពីព្រះមហាក្សត្រ ពុំអាចបញ្ចូលឈ្មោះនៅក្នុងបញ្ជីបោះឆ្នោតបានទេ ប៉ុន្តែតាមច្បាប់នៅពេលដែលចុះឈ្មោះថ្មី ទើបអាចចុះឈ្មោះវិញបាន។
លោក ទេព នីថា អគ្គលេខាធិការ គ.ជ.ប. មានប្រសាសន៍ថា តាមច្បាប់បោះឆ្នោតជាធរមាន គឺពុំមានកន្លែងណា បញ្ចូលឈ្មោះលោក សម រង្ស៊ី បាននៅពេលនេះទេ ពីព្រោះថា ច្បាប់បោះឆ្នោត បើកាលណាលុបចេញពីបញ្ជីបោះឆ្នោតហើយ គឺរហូតទៅដល់ការចុះឈ្មោះថ្មី ទើបអាចចុះបាន។
ហើយការបោះឆ្នោតឆ្នាំ២០១៣ នេះ គ.ជ.ប. ចុះឈ្មោះបញ្ចប់នៅថ្ងៃទី៣១ ខែធ្នូ ឆ្នាំ២០១២ បញ្ជីបោះឆ្នោត ត្រូវបាន គ.ជ.ប. ផ្តល់សុពលភាពរួចហើយ ហើយបញ្ជីបោះឆ្នោតនេះ តាមច្បាប់បោះឆ្នោត មិនអាចកែប្រែបានទេ។
លោកបានបញ្ជាក់ថា “ដើម្បីចុះឈ្មោះបានសម្រាប់ការបោះឆ្នោត២០១៣នេះ គឺមិនអាចចុះកើតទេ រហូតដល់ចុងឆ្នាំ២០១៣ ដែលយើងត្រូវចុះឈ្មោះប្រចាំឆ្នាំ ពីខែតុលា ទើបអាចចុះឈ្មោះបាន មានន័យថា ក្រោយការបោះឆ្នោត យើងពុំមានច្បាប់ ដែលអនុញ្ញាតឲ្យចុះឈ្មោះនៅពាក់កណ្តាលទី នៅពេលបោះឆ្នោតបានទេ” ៕ បញ្ចូលអត្តបទ៖ ហេង នាង
