ពលរដ្ឋបឹងកក់ និងបុរីកីឡាប្រមូលផ្តុំនៅមុខសាលារាជធានីភ្នំពេញ
នាព្រឹកថ្ងៃទី៨ ឧសភា ២០១២ ក្រុមស្ត្រីពលរដ្ឋបឹងកក់ បានប្រមូលផ្តុំនៅរបងសាលារាជធានីភ្នំពេញ ដើម្បីជំរុញឲ្យសាលារាជធានីភ្នំពេញ អនុវត្តន៍នូវអន្តរាគមន៍របស់ខុទ្ទកាល័យលោកនាយករដ្ឋមន្ត្រី ហ៊ុន សែន ពាក់ព័ន្ធនឹងបញ្ហាជម្លោះដីនៅបឹងកក់ និងបុរីកីឡា។
កញ្ញា គឹមហ៊ាង សកម្មជនអង្គការឃ្លាំមើលសិទ្ធិលំនៅដ្ឋាន បានឲ្យដឹងថា ក្រុមស្ត្រីពលរដ្ឋបឹងកក់ និងបុរីកីឡា បានប្រមូលផ្តុំនៅមុខសាលារាជធានីភ្នំពេញ នា គឺដើម្បីជំរុញឲ្យសាលារាជធានីភ្នំពេញ អនុវត្តន៍តាមអន្តរាគមន៍របស់ខុទ្ទកាល័យសម្តេចនាយករដ្ឋមន្ត្រី ហ៊ុន សែន ដែលបានធ្វើលិខិតមួយច្បាប់ទៅកាន់លោក កែប ជុតិមា អភិបាលរាជធានីភ្នំពេញ កាលពីថ្ងៃទី៣ ឧសភា ២០១២ ដើម្បីឲ្យដោះស្រាយបញ្ហាដីធ្លី ដែលពលរដ្ឋបឹងកក់ និងពលរដ្ឋបុរីកីឡា បានដាក់លិខិតតវ៉ា តាមរយៈការដើរហែក្បួន ទៅកាន់ខុទ្ទកាល័យសម្តេចហ៊ុន សែន កាលពីថ្ងៃទី២៦ មេសា ២០១២។
សកម្មជនអង្គការឃ្លាំមើលសិទ្ធិលំនៅដ្ឋានក៏បានបន្ថែមថា នៅព្រឹកថ្ងៃទី៨ឧសភា ឆ្នាំ២០១២ ក្រុមស្ត្រីបុរីកីឡា ក៏បានទៅប្រមូលផ្តុំនៅការិយាល័យឧត្តមស្នងការអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា ដើម្បីដាក់ញត្តិ ទៅកាន់លោក សុរិយា ស៊ូប៊ែឌី អ្នករាយការណ៍ពិសេសរបស់អគ្គលេខាធិការអង្គការ សហប្រជាជាតិ ដែលកំពុងបំពេញបេសកកម្ម នៅកម្ពុជា ដោយផ្តោតសំខាន់លើសម្បទានដីធ្លី៕
