ម៉ូតូបុកម៉ូតូវ ស្លាប់ពីរនាក់ របួសធ្ងន់ម្នាក់
Cambodia News/
ភ្នំពេញ៖ កាលពីវេលាម៉ោង ១ និង៤០នាទី អាធ្រាត្រឈានចូលថ្ងៃទី ១១ ខែ កក្កដា បុរស២នាក់បើកម៉ូតូយ៉ាងលឿន ហើយបានបុកគ្នាយ៉ាងពេញទំហឹង បណ្ដាលឲ្យពួកគេដេកស្លាប់ក្នុងថ្លុកឈាម ចំណែកស្ត្រីម្នាក់ដែលជិះជាមួយ រងរបួសជាទម្ងន់ តាមបណ្តោយផ្លូវព្រះសីហនុ កែងផ្លូវលេខ ១១៣ ក្នុងសង្កាត់បឹងកេងកងទី២ ខណ្ឌចំការមន ។
សាក្សីដែលឃើញករណីគ្រោះថ្នាក់ចរាចរណ៍ដ៏រន្ធត់ខាងលើនេះនិយាយថា មុនពេលកើតហេតុគេបានឃើញបុរស វ័យជាង ៤០ ឆ្នាំ ជិះម៉ូតូមួយគ្រឿង ម៉ាកគុបជ្រុង ធ្វើដំណើរតាមបណ្តោយផ្លូវ១១៣ ក្នុងទិសដៅពីត្បូងទៅជើង យ៉ាងលឿន ខណៈ មកដល់ចំណុចកែងផ្លូវព្រះសីហនុ ក៏ត្រូវបុរសម្នាក់ទៀតជិះម៉ូតូមួយគ្រឿងម៉ាក នីច ពណ៌ស ពាក់ស្លាកលេខ ភ្នំពេញ 1BS 8485 ឌុបស្រីស្នេហ៍ម្នាក់ ធ្វើដំណើរតាមបណ្តោយផ្លូវ ព្រះសីហនុ ក្នុងទិសដៅពីលិចទៅកើត ដោយបានបើកបរ ក្នុងល្បឿន លឿនដូចគ្នាក៏ជ្រុលទៅបុកចំពាក់កណ្តាលម៉ូតូគុបជ្រុងយ៉ាងពេញទំហឹង បណ្តាលឲ្យម្ចាស់ម៉ូតូគុបជ្រុង ហោះផ្លោងអូសជាប់ជាមួយម៉ូតូ បោកក្បាលហូរឈាមស្រោចខ្លួន ស្លាប់យ៉ាងអាណោចអាធ័មនៅក្នុងថ្លុកឈាម ។
ចំណែកបុរសជាម្ចាស់ម៉ូតូ នីច ក៏ត្រូវបោកក្បាលនឹងថ្នល់ស្លាប់បាត់បង់ជីវិតដូចគ្នា រីឯ ស្ត្រីម្នាក់ដែលរួមដំណើរ ជាមួយ នឹងបុរសជិះម៉ូតូ នីច ក៏ទទួលរងរបួសធ្ងន់ ត្រូវបានរថយន្តសាមុយ មកដឹកយកទៅសង្គ្រោះនៅមន្ទីរពេទ្យ។
ក្រោយកើតហេតុ ភ្លាមៗសាកសពទាំងពីរគេនៅមិនទាន់ ស្គាល់អត្តសញ្ញាណនៅឡើយទេ ដោយសមត្ថកិច្ចបាន នឹងកំពុងព្យាយាមទំនាក់ ទំនងទៅក្រុមគ្រួសាររបស់សាកសពដើម្បី ឲ្យមកទទួលយកទៅធ្វើបុណ្យតាមប្រពៃណី ៕
