កូរ៉េទាំងពីរចរចាគ្នាគ្រោងបើកតំបន់ឧស្សាហកម្ម Kaesong ឡើងវិញ
កូរ៉េខាងជើង និងកូរ៉េខាងត្បូងបានឯកភាពគ្នាផ្ដើមកិច្ចចរចាគ្នាឡើងវិញ ស្តីអំពីការគ្រោងនិងបើកឱ្យប្រើឡើងវិញ នូវរោងចក្រមួយរបស់ប្រទេសទាំងពីរដែលស្ថិត នៅលើដីរបស់កូរ៉េខាងជើងនៅក្នុងព្រឹកថ្ងៃពុធនេះ។ កាលពីខែមេសាកន្លងទៅរោងចក្រខាងលើ ត្រូវបានរដ្ឋាភិបាលទីក្រុងព្យុងយ៉ាងប្រកាសបិទ។
គណៈប្រតិភូ របស់ទីក្រុងសេអ៊ូល បានធ្វើដំណើរទៅទីក្រុងព្យុងយ៉ាងកាលពីព្រឹកមិញ ដើម្បីរៀបចំចរចាបើកតំបន់kaesong ដែលជាតំបន់ឧស្សាហកម្មសេរី កូរ៉េខាងជើង និងខាងត្បូង ឡើងវិញ។ ក្នុងរយៈពេលដែលបានបិទជាងបីខែកន្លងទៅ ធ្វើឱ្យកូរ៉េខាងត្បូងបានខាតបង់ជាទឹកប្រាក់អស់រាប់រយលានដុល្លារ អាមេរិក ដោយសារតែកម្មករកូរ៉េខាងជើងបាននាំគ្នាចាកចេញ។
មុន នឹងចេញដំណើរទៅរកកិច្ចពិភាក្សាខាងលើ ថ្នាក់ដឹកនាំការចរចារបស់ទីក្រុងសេអ៊ូល បានអះអាងថា ភាគីទាំងពីរនឹងខិតខំប្រឹងប្រែងឱ្យអស់ពីលទ្ធភាព ដើម្បីទទួលបាននូវកិច្ចព្រមព្រៀងមួយ ឈានទៅរកការបើកឱ្យដំណើរឡើងវិញនូវតំបន់ឧស្សាហកម្មខាងលើ។
កិច្ចពិភាក្សាមួយ កាលពីថ្ងៃអាទិត្យកន្លងទៅ រវាងភាគីទាំងពីរ បានទទួលនូវផលវិជ្ជមានតិចតួចហើយ ដោយភាគីទាំងពីរសម្រេចឱ្យមានការពិភាក្សាលម្អិតជាផ្លូវការនៅថ្ងៃ នេះ។ តែទោះបីជាយ៉ាងណា ទីក្រុងសេអ៊ូលនៅមានការព្រួយបារម្ភថា នឹងអាចមានការមិនយល់ព្រមណាមួយ ពីសំណាក់ទីក្រុងព្យុងយ៉ាង។ ដោយសារតែអង្គការសហប្រជាជាតិបានដាក់ទណ្ឌកម្មដល់ទីក្រុងព្យុងយ៉ាង ព្រោះរបបមួយនេះ បានព្យាយាមសាកល្បងអាវុធនុយក្លេអ៊ែររបស់ខ្លួន កាលពីខែកុម្ភៈកន្លងទៅ។
គួររម្លឹកថា កន្លងមកKaesong ជាតំបន់ឧស្សាហកម្មមួយ ដែលកូរ៉េខាងត្បូងបានបើកឡើង ដោយមានកម្មករជាជនជាតិកូរ៉េខាងជើងប្រមាណជាង៥ម៉ឺន ៣ពាន់នាក់ ធ្វើការក្នុងរោងចក្រចំនួន១២៣។ ហើយវាជាតំបន់មួយ ដែលធ្វើឱ្យប្រទេសបងប្អូនគូសត្រូវទាំងពីរ អាចរកបានការចរចាគ្នាមួយបានជាញឹកញាប់។តែការចរចាទាំងនេះគេ អាចទទួលបានត្រឹមតែសន្តិភាពបណ្ដោះអាសន្នប៉ុណ្ណោះ គឺប្រទេសទាំងពីរមិនទាន់អាចរកបាន នូវសន្ធិសញ្ញាសន្តិភាពទាំងស្រុងនោះឡើយ៕ដោយ ជា ប៊ុនធឿន (RFI)
