មិនទាន់មានការកំណត់ពេលវេលាពិតប្រាកដក្នុងការវិលត្រឡប់របស់លោក សម រង្ស៊ី
Cambodia News/
ភ្នំពេញ៖ នៅព្រឹកថ្ងៃពុធនេះ បណ្តាញព័ត៌មានក្នុងស្រុកមួយចំនួនបានធ្វើការផ្សព្វផ្សាយដោយដក ស្រង់ប្រភពពីមន្រ្តីគណបក្សសង្រ្គោះជាតិថា លោក សម រង្ស៊ី ប្រធានគណបក្សសង្រ្គោះជាតិ នឹងវិលត្រឡប់ចូលមកប្រទេសវិញនៅថ្ងៃទី១៩ ឬថ្ងៃទី២០ ខែកក្កដា ខាងមុខ ដោយមានក្រុមអ្នកគាំទ្រលោករង់ចាំទទួលលោកនៅព្រលានយន្តហោះផង។
បន្ទាប់ពីប្រព័ន្ធផ្សព្វផ្សាយព័ត៌មានក្នុងស្រុកមួយចំនួន បានផ្សព្វផ្សាយថា លោក សម រង្ស៊ី ប្រធានគណបក្សសង្រ្គោះជាតិ នឹងត្រឡប់ចូលមកប្រទេសកម្ពុជាវិញនៅមុនថ្ងៃទី២០ ខែកក្កដា នោះ អ្នកនាំពាក្យគណបក្សសង្រ្គោះជាតិបានចេញមកធ្វើការបដិសេធចំពោះព័ត៌មាននេះ។
បើតាមលោក យឹម សុវណ្ណ អ្នកនាំពាក្យគណបក្សសង្រ្គោះជាតិ នៅមិនទាន់មានការកំណត់ពេលវេលាឲ្យប្រាកដចំពោះការវិលត្រឡប់របស់ លោក សម រង្ស៊ី នោះទេ។ ប៉ុន្តែទោះជាយ៉ាងណាក៏ដោយលោកអះអាងថា ការវិលត្រឡប់របស់លោក សម រង្ស៊ី នៅមុនថ្ងៃបោះឆ្នោតខាងមុខ គឺមិនប្រែប្រួលឡើយ។
ជាមួយគ្នានេះលោក យឹម សុវណ្ណ បានបញ្ជាក់ថា រាល់ព័ត៌មានទាក់ទងនឹងគណបក្សសង្រ្គោះជាតិ ដែលមិនបានចេញពីមាត់របស់លោក និងប្រធានទាំងពីរ គឺលោក សម រង្ស៊ី និងលោក កឹម សុខា គឺជាព័ត៌មានដែលមិនអាចយកជាផ្លូវការទេ៕
