លោក សម រង្ស៊ី នឹងត្រូវចាប់ខ្លួន បើសិនមានវត្តមាននៅក្នុងប្រទេសកម្ពុជា
Cambodia News
ភ្នំពេញ៖ បន្ទាប់ពីការប្រកាសរបស់លោក សម រង្ស៊ី មេដឹកនាំគណបក្សប្រឆាំងកាលពីចុងសប្តាហ៍មុនដែលថា លោកនឹងវិលត្រឡប់មកប្រទេសកម្ពុជាវិញនៅមុនថ្ងៃបោះឆ្នោតខាងមុខ លោកឧត្តមសេនីយ៍ឯក គៀត ច័ន្ទថារិទ្ធ អ្នកនាំពាក្យប៉ូលិសជាតិបានអះអាងថា ដីកាចាប់ខ្លួនមេដឹកនាំគណបក្សប្រឆាំងរូបនេះនឹងអនុវត្តន៍ភ្លាម ប្រសិនបើលោកមានវត្តមាននៅក្នុងប្រទេសកម្ពុជា។
លោកឧត្តមសេនីយ៍ឯក គៀត ច័ន្ទថារិទ្ធ បានថ្លែងថា «ការវិលត្រឡប់ចូលក្នុងប្រទេសវិញរបស់លោក សម រង្ស៊ី គឺជាសិទ្ធិរបស់គាត់ ប៉ុន្តែក្នុងករណីដែលលោក សម រង្ស៊ី ពិតជាមកមែននោះ នគរបាលជាតិ ដែលជាស្ថាប័នប្រតិបត្តិច្បាប់ គ្មានជម្រើសអ្វីក្រៅពីអនុវត្តដីការបស់តុលាការឡើយ»។
សូមបញ្ជាក់ដែរថា លោក សម រង្ស៊ី ប្រធានគណបក្សសង្រ្គោះជាតិ ដែលជាគណបក្សប្រឆាំងក្នុងប្រទេសកម្ពុជា បាននិរទេសខ្លួនឯងចាប់តាំងពីឆ្នាំ២០០៩មក បន្ទាប់ពីរដ្ឋសភាបានដកអភ័យឯកសិទ្ធិតំណាងរាស្រ្តរបស់លោក ហើយតុលាការបានកាត់ទោសឲ្យជាប់ពន្ធនាគាររយៈពេល១២ឆ្នាំ ពីបទក្លែងបន្លំឯកសារសាធារណៈ ការផ្សាយព័ត៌មានមិនពិត និងសកម្មភាពដកតម្រុយបង្គោលព្រំដែនកម្ពុជា-វៀតណាម៕