ផ្ទុះគ្រាប់បែកនៅវត្តឥណ្ឌា Bodh Gaya របួសព្រះសង្ឃពីរអង្គ
នៅថ្ងៃអាទិត្យនេះ នៅប្រទេសឥណ្ឌា វត្តព្រះពុទ្ធសាសនាBodh Gaya ដែលជាបិតិកភណ្ឌពិភពលោក បានរងនូវការវាយប្រហារដោយការផ្ទុះគ្រាប់បែកជាច្រើនគ្រាប់ បណ្តាលអោយព្រះសង្ឈពីរអង្គរងរបួស។ ការផ្ទុះទាំងនេះមានកម្រិត ខ្សោយ មិនបានប៉ះពាល់ដល់ដល់ដើមពោធិព្រឹក្សដែលព្រះពុទ្ធទ្រង់ធ្លាប់គង់ នៅក្រោម កាលពី៥៣១ឆ្នាំមុនគ្រឹស្តសករាជនោះឡើយ។ នាយករដ្ឋមន្ត្រីឥណ្ឌា Manmohan Singh បានប្រកាសមិនអត់ឧនដល់ជនដៃដល់ដែលវាយប្រហារទីកន្លែងសាសនាឡើយ។
យោងតាម ប៉ូលិសឥណ្ឌា នៅព្រឹកថ្ងៃអាទិត្យនេះ មានការផ្ទុះគ្រាប់បែកក្នុងកម្រិតខ្សោយដល់ទៅ៨ បានវាយប្រហារមកលើវត្តព្រះពុទ្ធសាសនា Bodh Gaya បណ្តាលអោយព្រះសង្ឃទីបេមួយអង្គ និងព្រះសង្ឈភូមាមួយអង្គរងរបួស។ ប៉ូលិសបានធ្វើការទប់ស្កាត់គ្រាប់បែកចំនួនពីរគ្រាប់ទៀតមិនអោយ ផ្ទុះ។ ក្នុងនោះ គ្រាប់បែកមួយគ្រាប់ត្រូវបានគេដាក់នៅក្រោមរូបសំណាកព្រះពុទ្ធរូប មួយអង្គដែលមានកំពស់២៤ម៉ែត្រ។
ការផ្ទុះ នៅថ្ងៃអាទិត្យនេះ មិនបានប៉ះពាល់ដើមពោធិព្រឹក្សដែលព្រះសម្មាសម្ពុទ្ធធ្លាប់គង់នៅ ក្រោម កាលពី៥៣១ឆ្នាំមុនគ.ស ទេ។ គួរបញ្ជាក់ថា វត្ត Bodh Gaya ស្ថិតនៅចំងាយ១១០ គម ខាងត្បូងរដ្ឋធានីPatna ក្នុងរដ្ឋ Bihar ភាគឥសានឥណ្ឌា។ វត្តនេះជាវត្តព្រះពុទ្ធសាសនាយ៉ាងល្បីល្បាញមួយកន្លែងក្នុងលោក មានរក្សាទុកនូវដើមពោធិព្រឹក្សដែលមានវ័យចំណាស់យូរលង់ ទាក់ទាញពុទ្ធសាសនិកគ្រប់ទិសទីអោយចូលមកគោរពបូជា។
ក្រសួងមហាផ្ទៃឥណ្ឌាបានរិះគន់បរិហារការផ្ទុះនេះថាជា អំពើភេរវកម្ម។ ប៉ុន្តែ រហូតមកដល់ពេលនេះ នៅមិនទាន់មានក្រុមភេរវជនណាមួយប្រកាសថាខ្លួនបង្កការផ្ទុះអស់នេះ នៅឡើយទេ។ ការវាយប្រហារផ្នែកពុទ្ធសាសនានៅឥណ្ឌាកម្រកើតមានណាស់។ ដោយឡែក ថ្មីៗនេះ នៅប្រទេសភូមា បង់ក្លាដែសនិងស្រីលង្កាដែលនៅជិតខាងក្បែរនោះ គេឃើញមាននូវអំពើហិង្សាជាច្រើន រវាងអ្នកកាន់សាសនាព្រះពុទ្ធនិងអ្នកកាន់សាសនាអ៊ីស្លាម៕ដោយ ព្រំ សឿន សូលីណា (RFI)
