កូរ៉េខាងជើងត្រៀមចូលតុចរចា ៦ភាគីនៅទីក្រុងមូស្គូ
មន្ត្រីការបរទេសរបស់កូរ៉េខាងជើងបានធ្វើដំណើរទស្សនៈកិច្ចជាផ្លូវទូតនៅប្រទេសរុស្ស៊ី កាលពីថ្ងៃអង្គារទី ២ កក្កដា ម្សិលមិញ ទាក់ទងនឹងសំណុំរឿង នុយក្លេអ៊ែរ របស់ខ្លួន។ មន្ត្រីខាងលើបានចូលជួបថ្នាក់ដឹកនាំរុស្ស៊ីមុននឹងកិច្ចប្រជុំ ប្រាំមួយ ប្រទេសដែលបានគ្រោងនៅថ្ងៃទី៤កក្កដាស្អែកនេះ។
មុននឹងកិច្ចជំនួបប្រាំមួយភាគីមួយថ្ងៃ មន្ត្រីការទូតកូរ៉េខាងជើងបានចូលជួប ជាមួយភាគីរុស្ស៊ីដើម្បីពិភាគ្សា ស្តីពីសំណុំរឿងនុយក្លេអ៊ែររបស់ខ្លួន។ នារយះពេលចុងក្រោយនេះ ចិនហាក់ដូចជាប្ដូរឥរិយាបទបន្តិច ដោយរិះគន់ចំពោះនយោបាយនុយក្លេអ៊ែររបស់កូរ៉េខាងជើង។ ផ្ទុយពីពេលមុន ចិនតែងតែមានជំហរគាំទ្រកម្មវិធីនុយក្លេអ៊ែរ ប្រទេសគុម្មុយនីសមួយនេះ។
ហេតុផលខាងលើនៅក្នុងទស្សនកិច្ច ថ្ងៃអង្គារម្សិលមិញនេះ អនុរដ្ឋមន្ត្រីការបរទេសកូរ៉េខាងជើង ដែលជាអ្នកតំណាងកិច្ចចរចា បានចូលជួបជាមួយភាគីរុស្ស៊ីដែលគេយល់ថា នៅតែមានជំហរគាំទ្រនយោបាយនុយក្លែអ៊ែររបស់ខ្លួននៅឡើយ។
នៅថ្ងៃទី៤កក្កដាស្អែកនេះ នៅទីក្រុងមូស្គូ គេនឹងរៀបចំឱ្យមានកិច្ចចរចាមួយ រវាង៦ប្រទេសដែលមានដូចជា សហរដ្ឋអាមេរិក ចិន រុស្ស៊ី ជប៉ុន កូរ៉េខាងត្បូង និងកូរ៉េខាងជើងផ្ទាល់ ស្ដីពីសំណុំរឿងនុយក្លេអ៊ែរកូរ៉េខាងជើង។ នេះជាកិច្ចចរចាដែលបានស្នើឡើង ដោយលោកគីម ជុងអ៊ុនថ្នាក់ដឹកនាំវ័យក្មេង របស់ទីក្រុងព្យូងយ៉ាង។ដោយកន្លងមកកិច្ចចរចាជាច្រើន តែងតែទទួលបរាជ័យ។
គួររម្លឹកថា កិច្ចប្រជុំរវាង៦ប្រទេសខាងលើ ស្តីអំពីប្រធានបទនុយក្លេអ៊ែរ បានគ្រោងរៀបចំម្តងរួចទៅហើយនាឆ្នាំ២០០៣កន្លងទៅ តែត្រូវកូរ៉េខាងជើង សុំលើកពេលជាហូរហែរ។ ហើយអស់រយះពេលជាច្រើនសប្តាហ៍មកហើយ ដែលទីក្រុងព្យូងយ៉ាង តែងតែគំរាមដល់កូរ៉េខាងត្បូង និងសហគមន៍អន្តរជាតិជាញឹកញ៉ាប់ ដោយមានការដាក់ពង្រាយទ័ព និងគ្រាប់រ៉ូកែត ជាច្រើន នៅតាមបណ្ដោយព្រំដែនរបស់ ខ្លួនជាមួយទីក្រុងសេអ៊ូល។ តែគេឃើញថា ពេលនេះទីក្រុងព្យូងយ៉ាង បានបង្ហាញពីជំហរចង់ចូលតុចរចាទៅវិញ។
គោលបំណងរបស់សហគមន៍អន្តជាតិ គឺចង់ឱ្យកូរ៉េខាងជើងបញ្ឈប់កម្មវិធីអាវុធនុយក្លេអ៊ែររបស់ខ្លួនជា បន្ទាន់។ តែនៅក្នុងការប្រកាសកាល ពីថ្ងៃម្សិលមិញដដែលនេះ អ្នកតំណាងការទូតកូរ៉េខាងជើង បានប្រកាសថា រដ្ឋាភិបាលទីក្រុងព្យូងយ៉ាង មិនព្រមបោះបង់កម្មវិធីអាវុធនុយក្លេអ៊ែរឡើយ ប្រសិនជាសហរដ្ឋអាមេរិក នៅតែមិនឈប់ នយោបាយបែបរើសអើងមកលើកូរ៉េខាងជើងទៀត៕ដោយ ជា ប៊ុនធឿន (RFI)