ក្រសូងព័ត៌មាន ណែនាំប្រព័ន្ធផ្សព្វផ្សាយ ឲ្យគោរពនីតិវិធី គ.ជ.ប អំឡុងបោះឆ្នោត
Cambodia News
ភ្នំពេញ៖ អំឡុងយុទ្ធនាការបោះឆ្នោតនេះ ក្រសួងព័ត៌មានបានចេញសេចក្ដីណែនាំ ដល់បណ្ដាប្រព័ន្ធផ្សព្វផ្សាយទាំងអស់ឲ្យគោរពបទបញ្ជា និង នីតិវិធី របស់គណៈកម្មាធិការជាតិ រៀបចំការបោះឆ្នោត (គ.ជ.ប) ប្រយោជន៏ដើម្បីឲ្យដំណើរការបោះឆ្នោតប្រព្រឹត្តទៅ ដោយតម្លាភាព និង យុត្តិធម៌ ។
សេចក្ដីណែនាំដែលចុះហត្ថលេខាដោយលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន មានកិត្តិយសជម្រាបជូន ឯកឧត្តមលោកជំទាវ លោក លោកស្រីជានាយក នាយិកាស្ថានីយ វិទ្យុ ទូរទស្សន៍ ចាងហ្វាង កាសែតទស្សាវដត្តី ព្រឹត្តិបត្រទាំងអស់ជ្រាបថា ក្នុងគោលបំណងធានាឲ្យការបោះឆ្នោតបានប្រព្រិត្តទៅដោយសេរី ត្រឹមត្រូវ និងយុត្តិធម៌ ស្របតាមច្បាប់ស្តីពីការបោះឆ្នោតជ្រើសតាំងតំណាងរាស្ត្រ និងស្របតាមគោលការណ៍លទ្ធិប្រជាធិបធេយ្យ និងឲ្យប្រព័ន្ធផ្សព្វផ្សាយទាំងអស់ មានភាពអព្យាក្រិត្យក្នុងការផ្សព្វផ្សាយព័ត៌មានលើកកម្ពស់ការយល់ដឹងរបស់ប្រជាពលរដ្ឋពាក់ព័ន្ធទៅនឹងការបោះឆ្នោត។
ក្រសួងព័ត៌មាន សូមក្រើនរំឮក ដល់ឯកឧត្តម លោកជំទាវ លោក លោកស្រីជានាយក នាយិកា ស្ថានីវិទ្យុ ទូរទស្សន៍ ចាងហ្វាង កាសែតទស្សាវដត្តី ព្រឹត្រិបត្រទាំងអស់ ឲ្យយកចិត្តទុកដាក់ បន្ថែមទៀតចំពោះការហាមរាល់ការផ្សព្វផ្សាយ ដែលមានចែងក្នុងបទបញ្ជា និងនិតិវិធីសម្រាប់ការបោះឆ្នោតជ្រើសតាំងតំណាងរាស្ត្រនិតិកាលទី៥ ខាងមុខនេះ គឺត្រូវបញ្ឈប់ការផ្សព្វផ្សាយ និងការផ្សាយបន្តពីវិទ្យុបរទេសទាំងអស់អំពីការស្ទង់មតិ លទ្ធផលនៃការស្ទង់មតិ ដែលទាក់ទង និងដំណើរការបោះឆ្នោតក្នុងរយៈពេល៥ ថ្ងៃ មុនថ្ងៃបោះឆ្នោត និងថ្ងៃបោះឆ្នោតរួមទាំងបញ្ឈប់ការផ្សព្វផ្សាយពីសកម្មភាពឃោសនា អ្វីទាំងអស់អំឡុងពេល ២៤ម៉ោងមុនថ្ងៃបោះឆ្នោត និងថ្ងៃបោះឆ្នោត។
ទន្ទឹមនេះ ចំពោះប្រព័ន្ធផ្សព្វផ្សាយ ដែលមិនគោរពអនុវត្ត តាមសេចក្តីណែនាំនេះក្រសួងព័ត៌មាន នឹងចាត់វិធានការតាមច្បាប់ជាធរមាន៕ ដោយ៖ ហេង នាង
