ប្រធានអង្គការបរិស្ថាន និងអតីតប៉េអឹមម្នាក់ត្រូវគេបាញ់ស្លាប់នៅកោះកុង
នៅថ្ងៃទី២៦ មេសា ២០១២ លោក ឈុត វុទ្ធី ប្រធានអង្គការការពារធនធានធម្មជាតិ និងកងរាជអាវុធហត្ថកោះកុងម្នាក់ទៀតឈ្មោះ អ៊ិន រតនា ត្រូវបានគេបាញ់ស្លាប់ នៅក្នុងតំបន់សាងសង់ទំនប់វារីអគ្គិសនីដោយក្រុមហ៊ុនចិន នៅក្នុងស្រុកមណ្ឌលសីមា ខេត្តកោះកុង។
ប៉ុន្តែមកទាល់ពេលនេះនៅមិនទាន់មានមន្ត្រីណាម្នាក់អះអាង ពីមូលហេតុនៃការស្លាប់នេះថាមកពីបញ្ហាអ្វីនោះទេ។ ប៉ុន្តែព័ត៌មានក្រៅផ្លូវការបានឲ្យដឹងថា ដោយសារការកាប់បំផ្លាញព្រៃឈើនៅស្រុកមណ្ឌលសីមា។
តាមការឲ្យដឹងពីក្រុមការងាររបស់លោក ថុង ណារ៉ុង មេបញ្ជាការកងរាជអាវុធហត្ថខេត្តកោះកុង ដែលចុះស្រាវជ្រាវករណីនេះ គឺមានមនុស្សពីរនាក់បានស្លាប់។ ក្នុងនោះមានសកម្មជនអង្គការការពារព្រៃឈើម្នាក់ និងមន្ត្រីកងរាជអាវុធហត្ថម្នាក់។ ហើយអ្នកកាសែត (The Cambodia Daily) ២រូបក្នុងនោះមានម្នាក់ជាជនជាតិខ្មែរ ឈ្មោះ កញ្ញា ផន បុប្ផាបានបាត់ខ្លួន នៅកន្លែងកើតហេតុនោះដែរ។
តាមសេចក្តីរាយការណ៍ ជំហ៊ានដំបូងថា ស្ត្រីអ្នកកាសែតទាំងពីរនោះ ត្រូវបានគេឃាត់ខ្លួន ដោយសារតែចុះទៅយកការណ៍រឿងកាប់ឈើ ដែលជារឿងរស៊ើបបំផុត នៅចំណុចថ្មបាំង ក្នុងខេត្តកោះកុង៕
