ជប៉ុនបង្ហាញនាវាចម្បាំងដ៏ធំចំថ្ងៃខួប៦៨ឆ្នាំនៃការទម្លាក់គ្រាប់បែកនៅហ៊ីរ៉ូស្ហ៊ីម៉ា
ថ្ងៃអង្គារ ៦សីហានេះ គឺជាថ្ងៃគម្រប់ខួប ៦៨ឆ្នាំ នៃការទម្លាក់គ្រាប់បែកបរមាណូនៅហ៊ីរ៉ូស្ហ៊ីម៉ា កាលពីក្នុងសង្រ្គាមលោកលើកទី២។ ព្រឹត្តិការណ៍ដែលជំរុញឲ្យជប៉ុនប្រកាសសុំចុះចាញ់សង្រ្គាម។ នៅចំថ្ងៃខួបនៃការទម្លាក់គ្រាប់បែកនៅហ៊ីរ៉ូស្ហ៊ីម៉ានេះ ជប៉ុនក៏បានដាក់បង្ហាញជាសាធារណៈផងដែរនូវនាវាចម្បាំងដ៏ថ្មីស្រឡាង មួយ និងជានាវាចម្បាំងដ៏ធំបំផុត ដែលជប៉ុនមិនធ្លាប់មាន ចាប់តាំងពីក្រោយសង្រ្គាមលោកលើកទី២មក។
នៅព្រឹកថ្ងៃអង្គារនេះ នៅក្នុងទីក្រុងហ៊ីរ៉ូស្ហ៊ីម៉ា មនុស្សរាប់ម៉ឺននាក់ ដោយរួមមានទាំង ក្រុមគ្រួសារជនរងគ្រោះ និងជនរងគ្រោះដែលរស់រានមានជីវិត ព្រមទាំងមន្រ្តីរដ្ឋាភិបាលជប៉ុន និងមន្រ្តីទូតបរទេស បាននាំគ្នាធ្វើការជួបជុំគ្នា និងធ្វើការស្មឹងស្មាធិ៍ នៅក្រោយស្នូរជួងបានបន្លឺឡើង នៅម៉ោង ៨ និង១៥នាទីព្រឹក (ម៉ោងក្នុងស្រុក) ម៉ោងដែលគ្រាប់បែកបរមាណូទីមួយ ត្រូវបានយន្តហោះចម្បាំងអាមេរិកទម្លាក់ លើក្រុងហ៊ីរ៉ូស្ហ៊ីម៉ា កាលពីថ្ងៃទី៦ ខែសីហា ឆ្នាំ១៩៤៥។
គ្រាប់បែកបរមាណូមួយគ្រាប់នេះបានសម្លាប់មនុស្សប្រមាណជា ១៤ម៉ឺននាក់ មុននឹងគ្រាប់បែកមួយគ្រាប់ ទៀត ត្រូវបានអាមេរិកទម្លាក់នៅណាហ្កាសាគី នៅ៣ថ្ងៃក្រោយ គឺនៅថ្ងៃទី៩ សីហា ដែលបណ្តាលឲ្យមនុស្សយ៉ាងតិច ៧ម៉ឺននាក់ផ្សេងទៀតត្រូវបាត់បង់ជីវិត។ ការទម្លាក់គ្រាប់បែកបរមាណូទាំងពីរគ្រាប់នេះបានជំរុញឲ្យជប៉ុន ប្រកាសសុំចុះចាញ់សង្រ្គាម និងឈានទៅបញ្ចប់សង្រ្គាមលោកលើកទី២ នៅថ្ងៃទី១៥ ខែសីហា ឆ្នាំ១៩៤៥។
នៅក្នុងពិធីរំឭកខួប៦៨ឆ្នាំនៃការទម្លាក់គ្រាប់បែកបរមាណូ នៅព្រឹកថ្ងៃអង្គារនេះ ចៅហ្វាយក្រុងហ៊ីរ៉ូស្ហ៊ីម៉ាបានថ្លែងសន្យាចំពោះព្រលឹងជនរងគ្រោះថា “យើងនឹងធ្វើអ្វីៗគ្រប់យ៉ាងតាមដែលអាចធ្វើទៅបាន ដើម្បីកសាងពិភពលោកមួយប្រកបដោយសុខសន្តិភាព”។
ក៏ប៉ុន្តែ គាប់ជួននឹងថ្ងៃរំឭកខួបនៃការទម្លាក់គ្រាប់បែកបរមាណូ នៅហ៊ីរ៉ូស្ហ៊ីម៉ានេះ ពិធីមួយទៀតត្រូវបានរដ្ឋាភិបាលជប៉ុនរៀបចំធ្វើឡើង នៅទីក្រុងយ៉ូកូហាម៉ា ដើម្បីដាក់ឲ្យដំណើរការនូវនាវាដ៏ធំបំផុតមួយ ដែលជប៉ុនមិនធ្លាប់សាងសង់ ចាប់តាំងពីក្រោយសង្រ្គាមលោកលើកទី២មក។
នាវាចម្បាំងនេះ គឺជាប្រភេទនាវាផ្ទុកឧទ្ធម្ភាគចក្រ មានប្រវែង ២៤៨ម៉ែត្រ ហើយអាចផ្ទុកឧទ្ធម្ភាគចក្របាន ៩គ្រឿង។ បើតាមសេចក្តីប្រកាសរបស់ក្រសួងការពារជាតិជប៉ុន នាវាផ្ទុកឧទ្ធម្ភាគចក្រថ្មីនេះនឹងដើរតួសំខាន់ នៅក្នុងប្រតិបត្តិការសង្រ្គោះផង និងការពារដែនសមុទ្ររបស់ជប៉ុនផង។
ការដាក់ឲ្យដំណើរការនាវាចម្បាំងដ៏ធំនេះ ធ្វើឡើង នៅក្នុងពេលដែលជប៉ុនកំពុងតែមានភាពតានតឹងខ្លាំង ក្នុងជម្លោះដែនសមុទ្រជាមួយចិន ហើយនាយករដ្ឋមន្រ្តីថ្មីរបស់ជប៉ុន គឺលោកស្ហ៊ីនហ្សូ អាបេ និងគណបក្សអភិរក្សនិយមរបស់លោក ក៏កំពុងតែពិចារណាចង់ធ្វើការកែប្រែរដ្ឋធម្មនុញ្ញសន្តិភាពនិយម ដែលអាមេរិក និងសម្ព័ន្ធមិត្តបានបង្ខំឲ្យជប៉ុនទទួលយក ក្រោយពីជប៉ុនចាញ់សង្រ្គាមលោកលើកទី២៕ដោយ សេង ឌីណា (RFI)