ប៉េអឹមដុះក្បាលពោះ និងឡើងទម្ងន់ 114នាក់តម្រូវឱ្យសម្រករយៈពេល 6ខែ
Cambodia News
បន្ទាយមានជ័យ ៖ កាលពីព្រឹកថ្ងៃទី១៨ មិថុនា លោកឧត្តមសេនីយ៍ទោ រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស និងជាមេបញ្ជាការ កងរាជអាវុធហត្ថខេត្ត បានដាក់វិធានការយ៉ាង តឹងរឹងចំពោះកងកម្លាំងក្រោមឱវាទ ដែលដុះក្បាល ពោះកំប៉េងកំប៉ោង និងឡើងទម្ងន់ខុសប្រក្រតីចំនួន ១១៤នាក់ ក្នុងចំណោមជាង៣០០នាក់ ឱ្យហ្វឹកហាត់ដើម្បីឱ្យ សម្រកទាំងក្បាលពោះ និង ទម្ងន់រយៈពេល៦ខែ ឱ្យបានសម្រេច ដោយចាប់ផ្តើមពីថ្ងៃទី១៨ មិថុនា តទៅ ។
លោកឧត្តមសេនីយ៍ទោ រ័ត្ន ស្រ៊ាង បានថ្លែងថា កងកម្លាំងដែលដុះក្បាលពោះ និងឡើងទម្ងន់ធាត់កន្ទ្រេលកន្ទ្រលបែបនេះ មិនសមជាកងកម្លាំងមានសមត្ថកិច្ចនោះទេ ។ កងកម្លាំងគ្រប់រូបមិនអាចមានដុះក្បាលពោះ និងឡើងទម្ងន់បានឡើយ គឺកងកម្លាំងប្រដាប់អាវុធត្រូវមាន ភាពស្វាហាប់រឹងមាំ និងភាពរវៀសរវៃ ជាមួយនឹងការងារ ការពារសន្តិសុខជូនប្រជាពលរដ្ឋ និងប្រទេសជាតិ ។
លោកឧត្តមសេនីយ៍ទោ រ័ត្ន ស្រ៊ាង បាននិយាយដាស់តឿន កងកម្លាំងដុះក្បាលពោះធំៗទៀតថា កងកម្លាំងដែលមានដុះក្បាលពោះ និងឡើងទម្ងន់ គឺពិតជាមិនស្រួលក្នុង ការបំពេញការងារនោះទេ ហើយសុខភាពក៏ប្រឈមទៅនឹងនឹងជំងឺ លើសឈាម និងទឹកនោមផ្អែម នឹងឈានទៅបាត់បង់ សមត្ថភាពការងារមិនខានឡើយ ។
លោកឧត្តមសេនីយ៍ទោ បានណែនាំយ៉ាងម៉ឺងម៉ាត់ទៀតថា ទុកពេលឱ្យហាត់ដោយខ្លួនឯង ហើយរយៈពេល៦ខែ លោកធ្វើការត្រួតពិនិត្យម្តង បើកងកម្លាំងណាម្នាក់មិនបានបញ្ចុះទម្ងន់ទេនោះ លោកនឹងឱ្យគ្រូមកហ្វឹកហាត់ផ្ទាល់តែម្តង៕
