ម៉ូតូបុកម៉ូតូ ស្លាប់ម្នាក់ រងរបួសធ្ងន់ ស្រាល២នាក់
Cambodia News
ភ្នំពេញ៖ កាល ពីវេលា ម៉ោង៨ និង៥០នាទី ថ្ងៃទី១៨ ខែមិថុនា យុវជម្នាក់បានស្លាប់ភ្លាមៗ នៅនឹងកន្លែងកើត ហេតុ រីឯ២នាក់ទៀត រងរបួសធ្ងន់ស្រាល ដោយសារតែ ម៉ូតូពីរគ្រឿងបើកច្រាសទិសគ្នា បុកគ្នាយ៉ាងពេញទំហឹង ស្ថិតតាមបណ្តោយផ្លូវជាតិលេខ៣ ក្នុងភូមិក្រាំងដូនទ័យ សង្កាត់ចោមចៅ ខណ្ឌពោធិ៍សែនជ័យ។
នគរបាលបានឲ្យដឹងថា ជនរងគ្រោះដែលស្លាប់មានឈ្មោះ ប្រុស ហៅតឿ ភេទប្រុសអាយុ២៥ឆ្នាំមានមុខរបរជា ជាជាងម៉ាស៊ីនកាត់ដេររោងចក្រស្បែកជើ់ងវត្តអង្គតាកៀត ស្នាក់នៅផ្ទះជួលភូមិកប់គង សង្កាត់ចោមចៅ ខណ្ឌពោធិ៍សែនជ័យ មានស្រុកកំណើតនៅភូមិដូនយ៉យ ឃុំដូនយ៉យ ស្រុកដងទង់ ខេត្តកំពត រីឯភាគីម្ខាងទៀត ដែលរងរបួសធ្ងន់ឈ្មោះសេង គន្ធី មានអាយុ២១ឆ្នាំ មុខរបរកម្មកររោងចក្រ នៅតំបន់អភិវឌ្ឍន៍ សេដ្ឋកិច្ចពិសេស រស់នៅភូមិព្រៃរងៀង សង្កាត់ភ្លើងឆេះរទេះ ខណ្ឌពោធិ៍សែនជ័យ។
សាក្សីកន្លែងកើតហេតុបានឲ្យដឹងថា មុនពេលកើតហេតុ គេឃើញម៉ូតូមួយគ្រឿង ម៉ាកសេ១២៥ ប្រើប៊ិច ពណ៌ខ្មៅ ពាក់ស្លាកលេខភ្នំពេញ1BE-4684 ជិះគ្នា២នាក់បើកក្នុងល្បឿនលឿនក្នុងទិសដៅ ពីត្បូងទៅជើង លុះដល់ចំណុចកើតហេតុ ស្រាប់តែមានម៉ូតូមួយគ្រឿង ម៉ាកសេ៥០ ពណ៌ទឹកប៊ិច ពាក់ស្លាកលេខភ្នំពេញ1L-5661 ជិះម្នាក់ឯងបត់ឆ្លង ផ្លូវក្នុងទិសដៅពីលិចទៅកើត ធ្វើឲ្យម៉ូតូសេ១២៥ ចាប់ហ្រ្វាំង មិនទាន់ក៏ជ្រុលទៅបុក យ៉ាងពេញទំហឹង បណ្តាលឲ្យជនរងគ្រោះ ជិះម៉ូតូសេ៥០ ស្លាប់ភ្លាមៗ នៅនឹងកន្លែង ដោយបែកក្បាល ធ្លាយខួរដោយសារជុងនឹងឈ្នាន់ម៉ូតូ ចំណែកឯភាគីម៉ូតូសេ១២៥ គឺរងរបួសធ្ងន់ស្រាល ទាំងពីរនាក់ ដោយម្នាក់រងរបួសបែកក្បាល សន្លប់ឈឹងនៅនឹងកន្លែងរី ឯម្នាក់ទៀតរង របួសស្រាលបានរត់ គេចខ្លួនបាត់ ។
ក្រោយពេលកើតហេតុ នគរបាលចរាចរខណ្ឌ ចុះទៅដល់ភ្លាមៗ នឹងបានហៅ រថយន្តសង្គ្រោះ របស់អង្គភាព៧១១ កងពលតូចលេខ៧០ ដឹកយកទៅកាន់មន្ទីរព្រះ កុសមៈ ហៅមន្ទីរពេទ្យលោកសង្ឃ ដើម្បីជួយសង្គ្រោះអាយុជីវិតជាបន្ទាន់ ។ ចំណែកឯកសាកសពត្រូវ ប្រគល់ទៅ ឲ្យក្រុមគ្រួសារយកទៅធ្វើ បុណ្យតាមប្រពៃណី។ រីឯវត្ថុតាងប្រគល់ទៅនគរបាលចរាចរ ជើងគោករាជធានីភ្នំពេញ ដើម្បីរង់ចាំដោះ ស្រាយគ្នាជាក្រោយ៕ ដោយ៖ ហេង នាង
