អតីត ម៉ែក្មេកកឹម សុខា ប្រាប់ថាជារឿងបុគ្គលផ្ទាល់ខ្លួនគ្មានអ្នកនៅពីក្រោយទេ
Cambodia News
ភ្នំពេញ ៖ អ្នកស្រី សម ផល្លា អតីត ម្ដាយក្មេកលោកកឹម សុខា អនុប្រធាន គណបក្សសង្គ្រោះជាតិ បានបញ្ជាក់ច្បាស់ ថា រឿងរ៉ាវតាមសុំប្រាក់ឧបត្ថម្ភ ឬប្រាក់ ជំងឺចិត្ដពីលោកកឹម សុខា ម្ដងហើយ ម្ដងទៀត រហូតដល់មានអំពើហិង្សាពី សំណាក់ក្មួយស្រីលោកកឹម សុខា និង កងអង្គរក្សរបស់លោកកឹម សុខា នោះ គ្មានអ្នកណា នៅពីក្រោយខ្នងនោះទេ ។
ការបញ្ជាក់ យ៉ាងដូច្នេះឆ្លើយតបទៅនឹងអ្វីដែលលោក កឹម សុខា បានអះអាងថា ស្ដ្រី២នាក់ ម្ដាយកូនដែលតាមឆាឆៅលោកគ្រប់ ទីកន្លែងនោះ ត្រូវបានជួលឬបង្កើតឡើង ដោយគណបក្សប្រជាជនកម្ពុជា ។
វេលាម៉ោង២រសៀលថ្ងៃទី១៨ ខែ មិថុនា ឆ្នាំ២០១៣ អ្នកស្រី សម ផល្លា បានចាកចេញពីមន្ទីរពេទ្យកាល់ម៉ែត បន្ទាប់ពីសុខភាពរបស់អ្នកស្រីបានធូរ ស្បើយ ។
អ្នកស្រីសម ផល្លា បាននិយាយថា នឹងដាក់ពាក្យបណ្ដឹងទៅកាន់ សាលាដំបូងរាជធានីភ្នំពេញដើម្បីឱ្យ ច្បាប់ផ្ដន្ទាទោសចំពោះជនដែលប្រព្រឹត្ដ ហិង្សាមកលើអ្នកស្រីបណ្ដាលឱ្យមាន របួសធ្ងន់ធ្ងរ ។ អ្នកស្រីអះអាងថា បាន ស្វះស្វែងរកមេធាវី និងពិភាក្សាគ្នាដើម្បី រៀបចំពាក្យបណ្ដឹងដាក់ចូលសាលាដំបូង រាជធានីភ្នំពេញនៅក្នុងពេលឆាប់ៗនេះ ។
ចំពោះការលើកឡើងថា អ្នកស្រី និង កូនដើរតាមឆាឆៅយាយីលោកកឹម សុខា ជាឆាករៀបចំដោយគណបក្សកាន់អំណាច នោះ អ្នកស្រីសម ផល្លា បាននិយាយយ៉ាង ដូច្នេះថា “ខ្ញុំសូមស្បថ រឿងនេះជា រឿងផ្ទាល់ខ្លួនរបស់ខ្ញុំ មិនមានការបញ្ជា ឬពាក់ព័ន្ធជាមួយគណបក្សនយោ បាយណាមួយនោះទេ៕