នាយករដ្ឋមន្ត្រី បង្ហាញទំនុកចិត្ត១០០ភាគរយថា នឹងឈ្នះលើការបោះឆ្នោតនាពេលខាងមុខ
Cambodia News
តាកែវ៖ ក្នុងពិធីសម្ពោធដាក់ឲ្យប្រើប្រាស់មជ្ឈមណ្ឌល និងសាលាបាល់ទាត់ជាតិក្នុងស្រុកបាទី ខេត្តតាកែវ នាថ្ងៃទី១៨ មិថុនា នេះ លោកនាយករដ្ឋមន្ត្រី លោក ហ៊ុន សែន បានប្រកាសដោយជំនឿ១០០ភាគរយប្រាប់ប្រជាពលរដ្ឋខ្មែរក្នុងខេត្ត តាកែវថា លោកនឹងនៅតែជានាយករដ្ឋមន្ត្រីដដែល សម្រាប់អាណត្តិទី៥ ឆ្នាំ២០១៣ ដល់ឆ្នាំ២០១៨។
លោកនាយករដ្ឋមន្ត្រី ប្រកាសដូចនេះស្របពេលដែលការបោះឆ្នោតនៅថ្ងៃទី២៨ខែកក្កដា ខិតជិតមកដល់ និងយុទ្ធនាការនៃការបោះឆ្នោត នឹងចាប់ផ្តើមចាប់ពីថ្ងៃទី២៧ខែមិថុនា ដល់ថ្ងៃទី២៨ខែកក្កដានេះ។ លោក ហ៊ុន សែន បន្តថា នៅឆ្នាំ២០១៨ លោកក៏មិនទាន់ចាស់ដែរ គឺលោកទើបតែមានអាយុ៦៦ឆ្នាំ បើទោះជាលោកបានកំពុងកាន់អំណាចជិត៣៤ឆ្នាំមកហើយ រហូតមកដល់ពេលនេះ។
លោកនាយករដ្ឋមន្ត្រីបញ្ជាក់ថា ៖ « វាច្បាស់ជាឈ្នះហើយ អារឿងហ្នឹង មិនចាំបាច់សង្ស័យទេ ហើយនៅតែជាង១ខែ ខាងមុខទៀត គឺការបោះឆ្នោតមួយនឹងមកដល់ ការឈ្នះនោះវាឈ្នះហើយ ២០១៣ ២០១៨ ច្បាស់ជា ហ៊ុន សែន ធ្វើជានាយករដ្ឋមន្រ្ដី អាហ្នឹងមិនបាច់គិតទេ»។
របាយការណ៍វិទ្យាស្ថានអន្តរជាតិសហរដ្ឋអាមេរិក IRI ដែលត្រូវបានមេដឹកនាំនយោបាយ លើកយកមកបកស្រាយរៀងៗខ្លួននោះ ឲ្យដឹងថា អ្នកគាំទ្រគណបក្សប្រជាជនកម្ពុជា មាន៧៧ភាគរយ។ ចំណែកអ្នកគាំទ្រគណបក្សសង្គ្រោះជាតិ មានចំនួន៥៤ភាគរយ៕
