លោកហ៊ុន សែនដាស់តឿនមន្ត្រីជំនាញពីជំហានឆ្ពោះទៅលុបបំបាត់ជំងឺគ្រុនចាញ់
ក្នុងឱកាសនៃទិវាជាតិប្រយុទ្ធនឹងជំងឺគ្រុនចាញ់ នៅថ្ងៃ២៥ មេសា ២០១២នេះ លោកហ៊ុន សែន បានក្រើនរំលឹកដល់មហាជន និងមន្ត្រីជំនាញ ឲ្យពិចារណាបន្ថែមទៀតអំពីជំហានឆ្ពោះទៅរកការលុបបំបាត់ជំងឺគ្រុនចាញ់នៅកម្ពុជា។
ដើម្បីឆ្ពោះទៅរកការលុបបំបាត់ជំងឺគ្រុនចាញ់នៅកម្ពុជា សម្រាប់ទិវាជាតិប្រយុទ្ធនឹងជំងឺគ្រុនចាញ់ ថ្ងៃទី២៥ មេសា លោកហ៊ុន សែន បានលើកឡើងថា យើងត្រូវពិចារណាលើបញ្ហាមួយចំនួន រួមមាន៖ ទី១-ការចម្លងជំងឺគ្រុនចាញ់ ចំពោះប្រជាជនផ្លាស់ទីលំនៅពីតំបន់ដែលគ្មានជំងឺគ្រុនចាញ់ ទៅតំបន់ដែលមានជំងឺគ្រុនចាញ់ខ្ពស់ នៅក្នុងប្រទេស ជាពិសេសការដ្ឋានចម្ការកៅស៊ូ ចម្ការដំទ្បូង ការដ្ឋានថាមពលអគ្គិសនី ការដ្ឋានសាងសង់ស្ពាន ជាដើម។
ទី២-ភាពស្មុគស្មាញមួយទៀត គឺថាភ្នាក់ងារចម្លងនូវជំងឺគ្រុនចាញ់ កំពុងបង្ហាញនូវនិន្នាការផ្លាស់ប្តូរលក្ខណៈរបស់វា ដែលបង្កឲ្យមានភាពស៊ាំទៅនឹងថ្នាំសម្លាប់សត្វល្អិត។ ទី៣-ប៉ារ៉ាស៊ីតជំងឺគ្រុនចាញ់ នៅតាមកន្លែងខ្លះចាប់ផ្តើមមានភាពស៊ាំនឹងថ្នាំប្រឆាំងជំងឺ គ្រុនចាញ់ដ៏មានប្រសិទ្ធភាព ដូចជា ថ្នាំអារមេមិស៊ិនីន ជាដើម និងទី៤-ការយល់ដឹងរបស់ប្រជាជនមួយចំនួនអំពីការការពារខ្លួនពី ជំងឺគ្រុនចាញ់នៅមានកម្រិត ជាក់ស្តែងចំនួនប្រជាជនដែលប្រើប្រាស់មុងជ្រលក់ថ្នាំក៏មានកម្រិនៅទ្បើយ។
ជាមួយគ្នានោះ លោកហ៊ុន សែន បានលើកឡើងពីផែនការយុទ្ធសាស្ត្រជាតិលុបបំបាត់ជំងឺគ្រុនចាញ់ ឆ្នាំ២០១១ ដល់ឆ្នាំ២០២៥ របស់រាជរដ្ឋាភិបាល ដែលបានកំណត់ថា នឹងសម្រេចឲ្យបាន ៩៥ ភាគរយ នៅឆ្នាំ២០១៤ ក៏ប៉ុន្តែជាក់ស្តែងយើងបានសម្រេចជិត ១០០ ភាគរយ នៅឆ្នាំ២០១២ តាមរយៈយុទ្ធនាការចែកមុងចំនួន ២៧.០០០.០០០ មុង ជូនប្រជាពលរដ្ឋចំនួន ៨១២.០០០ គ្រួសារ ដែលមានប្រជាជនចំនួន ៣.០៤០.០០០ នាក់ ដែលយើងបានធ្វើក្នុងរយៈកាល ៤ខែ ចាប់ពីខែវិច្ឆិកា ឆ្នាំ២០១១ ដល់ខែកុម្ភៈ ឆ្នាំ២០១២ បានសម្រេចលើសផែនការ និងបីឆ្នាំ មុនកាលកំណត់។
សូមរម្លឹកថា ជំងឺគ្រុនចាញ់ នៅក្នុងប្រទេសកម្ពុជា បានសម្លាប់មនុស្ស ៩៣ នាក់ នៅឆ្នាំ២០១១។ ចំនួនអ្នកស្លាប់នេះ បានថយចុះ ៣៥ ភាគរយ បើធៀបនឹងឆ្នាំ២០១០ ដែលមានអ្នកស្លាប់ដោយជំងឺគ្រុនចាញ់ ចំនួន ១៥១ នាក់។ នេះបើតាមរបាយការណ៍របស់មជ្ឈមណ្ឌលជាតិប្រឆាំងជំងឺគ្រុនចាញ់។ ជំងឺគ្រុនចាញ់ ត្រូវបានឆ្លងតាមរយៈសត្វមូសដែកគោលញីខាំ ហើយជនរងគ្រោះនៃជំងឺគ្រុនចាញ់ មានគ្រប់វ័យ ជាពិសេសទារក កុមារ និងស្ត្រីមានផ្ទៃពោះ ដែលភាគច្រើនរស់នៅតំបន់ដាច់ស្រយាល៕
