បណ្តាញសហគមន៏ អំពាវនាវឲ្យរដ្ឋាភិបាល ដោះលែងសកម្មជនសិទ្ធិមនុស្ស ដីធ្លី និងធនធានធម្មជាតិ
Cambodia News
ភ្នំពេញ៖ នៅព្រឹកថ្ងៃទី១២ មិថុនា នេះ បណ្តាញកសាងសន្តិភាពសហគមន៍ ប្រមាណជា ៤០០នាក់ មកពី ២៤ រាជធានី-ខេត្ត-ក្រុង នៅ បានប្រមូលផ្តុំគ្នា នៅមុខក្រសួងយុត្តិធម៌ ដាក់ញត្តិជូនក្រសួងយុត្តិធម៌ រដ្ឋសភា និងឧត្តមក្រុមប្រឹក្សានៃអង្គចៅក្រម ទាមទារឲ្យដោះលែងសកម្មជនសិទ្ធិមនុស្ស ដីធ្លី និងធនធានធម្មជាតិ។
ប្រជាសហគមន៍ដែលបានមកដាក់ញត្តិនេះ បានចងក្រណាត់ក្រហមនៅលើក្បាល កាន់បដា ក្នុងគោលបំណងនៃការដាក់ញត្តិ គឺស្នើសុំឲ្យក្រសួងយុត្តិធម៌ រដ្ឋសភា និងឧត្តមក្រុមប្រឹក្សានៃអង្គចៅក្រម អន្តរាគមន៍ឲ្យមានការដោះលែង បញ្ឈប់ការចោទប្រកាន់ និងបញ្ឈប់ការតាមចាប់ខ្លួនសហគមន៍ដីធ្លី ធនធានធម្មជាតិ លំនៅឋាន និងអ្នកការពារសិទ្ធិមនុស្ស ឲ្យមានសេរីភាពឡើងវិញ។
តាមសេចក្តីប្រកាសព័ត៌មានរបស់បណ្តាញកសាងសន្តិភាពសហគមន៍ បានឲ្យដឹងថា រយៈពេល ៥ឆ្នាំចុងក្រោយនេះ អ្នកការពារសិទ្ធិមនុស្ស ដីធ្លី ធនធានធម្មជាតិ និងលំនៅឋានជាច្រើន បានទទួលនូវការគំរាមកំហែងពីប្រព័ន្ធតុលាការ តាមរយៈការចាប់ខ្លួន ការចោទប្រកាន់ដោយបំភ្លៃរឿងក្តីទៅជាបទល្មើសផ្សេងៗ ដូចជា បទល្មើសព្រហ្មទណ្ឌ ញុះញង់ ឆបោក និងការរំលោភកម្មសិទ្ធិឯកជន ជាដើម។
ការចោទប្រកាន់ទាំងនេះ ខុសពីការពិត ហើយលើសពីនេះទៀត សកម្មជនការពារធនធានធម្មជាតិ និងសិទ្ធិមនុស្សមួយចំនួនត្រូវបានគេធ្វើឃាដ ដោយមិនបានធ្វើការដោះស្រាយរកយុត្តិធម៌ជូនពួកគេឡើយ៕
