លោក ឈូក បណ្ឌិត មិនចូលខ្លួនក្នុងសាវនាការទៀត ហើយនៅថ្ងៃនេះ
Cambodia News
ស្វាយរៀង៖ សាលាដំបូងខេត្តស្វាយរៀង បន្តបើកសវនាការជាថ្មីទៀត នៅថ្ងៃពុធនេះ លើសំណុំរឿងបាញ់កម្មកររោងចក្រមួយ នៅក្រុងបាវិត ដោយបន្តអវត្តមាន របស់ជនសង្ស័យ ឈូក បណ្ឌិត ដែលរងការចោទថា ជាអ្នកបាញ់ប្រហារទៅលើកម្មករ។
លោក ឈូក បណ្ឌិត អតីតអភិបាលក្រុងបាវិត ត្រូវបានសាលាឧទ្ទរណ៍រកឃើញថា ជាប់ពាក់ព័ន្ធនឹងព្រឹត្តិការណ៍បាញ់ប្រហារកម្មកររោងចក្រនៅក្រុង បាវិត ឲ្យរងរបួស៣នាក់ កាលពីថ្ងៃទី២០ ខែកុម្ភៈ ឆ្នាំ២០១២ និងបញ្ជាឲ្យសាលាដំបូងខេត្តនេះ បើកសវនាការជំនុំជម្រះឡើងវិញ។
សវនការបានចាប់ផ្ដើមតាមការគ្រោងទុក ប៉ុន្តែ លោក ឈូក បណ្ឌិត មិនបង្ហាញខ្លួនក្នុងសវនាការទេ។ ក្នុងសវនការ លោកចៅក្រមបានឲ្យដឹង ថា លោក ឈូក បណ្ឌិត បានអវត្តមាន ជាថ្មីទៀត ប៉ុន្តែសវនាការនៅតែបន្ត។
នៅក្នុងសវនាការដែលដំណើរការនៅព្រឹកនេះ មានភាពចម្រូងចម្រាស់ ដោយសារមេធាវីចុងចោទ បានស្នើសុំចៅក្រមពន្យាពេលសវនាការ ចំណែកមេធាវីដើមចោទ បានស្នើសុំបន្ត។ បន្ទាប់ពីដកឃ្លាពិចារណាមួយសន្ទុះមក ចៅក្រមបានប្រកាសបន្តសវនាការ តែមេធាវីលោក ឈូក បណ្ឌិត បានដើរចេញពីបន្ទប់សវនាការ ដោយប្រកាសថា មិនអាចបន្តសវនាការបាន៕
