អាមេរិក-ជប៉ុន បើកសមយុទ្ធយោធារួមគ្នាមួយ នៅតាមបណ្តាកោះឆ្ងាយៗ
កាលថ្ងៃអង្គារម្សិលមិញ ជប៉ុននិងសហរដ្ឋអាមេរិកបាន ចាប់ផ្តើម បើកធ្វើសមយុទ្ធយោធាមួយរួមគ្នា នៅតាមបណ្តាកោះឆ្ងាយៗ។ ការប្រកាសធ្វើសមយុទ្ធខាងលើនេះ ធ្វើឲ្យ ស្ថានភាពជម្លោះដណ្តើមកោះគ្នារវាងជប៉ុន និងចិនកាន់តែតានតឹងឡើងៗ។ ដោយចិនយល់ថា នេះជាការបង្អូនសាច់ដុំមួយរបស់ជប៉ុន ក្រោមការជួយជ្រោមជ្រែងពីសំណាក់សហរដ្ឋអាមេរិក។
រដ្ឋមន្រ្តី ក្រសួងការពារជាតិជប៉ុនបានបញ្ជាក់ថា សមយុទ្ធយោធាខាងលើនេះ គឺធ្វើឡើងនៅ កាលីហ្វ័រនី (Californie) ដោយមិនបានសំដៅទៅរកប្រទេសចិនទេ។ រដ្ឋាភិបាលទីក្រុងតូក្យូចង់ប្រកាសប្រាប់មុន កុំឲ្យប្រទេសចិនមានការព្រួយបារម្ភឲ្យសោះ។ នេះគ្រាន់តែជាការ សាកល្បង សហប្រត្តិបត្តិការគ្នា ផ្នែកយោធារវាង ជប៉ុន-អាមេរិក ប៉ុណ្ណោះ
នៅក្នុងការសាកល្បងខាងលើនេះ គេឃើញមានវត្តមានរបស់ក្រុមទាហ៊ានជើងគោគ ជើងទឹក និងផ្លូវអាកាស របស់ជប៉ុន សរុបប្រមាណ ១ ០០០នាក់។ ក្រុមទាំងនោះ នឹងចូលរួមធ្វើសមយុទ្ធយោធារួមគ្នាជាលក្ខណៈចម្រុះជាតិសាសន៍ ដែលមានដូចជា កងទ័ពអាមេរិក កាណាដា និង នូវែលសេឡង់។ សមយុទ្ធនេះ បានចាប់ផ្តើមពី ថ្ងៃអង្គារទី១១ ដល់ ថ្ងៃទី២៦ ខែមិថុនាខាងមុខ។
មុននឹងឈានដល់ការធ្វើសមយុទ្ធនេះ ជប៉ុន និងអាមេរិក ក៏បានប្រកាសត្រៀមបញ្ជូនទ័ពទៅកាន់តំបន់ជាប់ជម្លោះ ម្តងរួចមកហើយ កាលពីចុងឆ្នាំ ២០១២។ តែក្នុងពេលនោះ ដៃគូទាំងពីរ បានសម្រេចចិត្តបោះបង់ ការបញ្ជូនទ័ពរបស់ខ្លួនទៅវិញ ដើម្បីជៀសវាង នូវភាពតានតឹង ផ្នែកយោធា មួយកម្រិតទៀតជាមួយប្រទេសចិន។
សូម រម្លឹកថា ជម្លោះដណ្តើមកោះ សេនកាគូ តាមភាសាជប៉ុន ឬ ទាវយូ តាមភាសាចិន នៅតែជាប្រធានបទក្តៅគគុករវាងប្រទេសទាំងពីរ។ កម្តៅកាន់តែកើនឡើងខ្លាំងបន្ថែមទៀត បន្ទាប់ពីរដ្ឋាភិបាលជប៉ុន បានទិញកោះមួយចំនួន មកធ្វើជាសម្បត្តិរដ្ឋ កាលពី ខែកញ្ញា ឆ្នាំ២០១២៕ ដោយ ជា ប៊ុនធឿន (RFI)
