រដ្ឋាភិបាលណៃពីដ៏បានអំពាវនាវឲ្យមានភាពស្ងប់ស្ងាត់ ក្រោយអំពើហិង្សាសាសនា
នៅថ្ងៃពុធ ទី២៩ ឧសភានេះ រដ្ឋាភិបាលភូមាបានអំពាវនាវឲ្យមានភាពស្ងប់ស្ងាត់ មួយថ្ងៃ ក្រោយការផ្ទុះឡើងនូវអំពើហិង្សាសាសនាដែលបានកើតឡើងនៅក្នុងស្រុក មួយស្ថិតប៉ែកឦសានប្រទេស។ អ្នកដែលបានទទួលរងគ្រោះខ្លំាងនៅក្នុងអំពើហិង្សានោះ គឺអ្នកកាន់សាសនាអ៊ីស្លាមដោយមានការដុតបំផ្លាញវិហារមួយ និងគ្រឹះស្សានរក្សាក្មេងក្រពាមួយរបស់ពួកគេ។
អំពើហិង្សាសាសនាថ្មីនេះបានកើតមានឡើងនៅក្នុងក្រុង Lashio នៃរដ្ឋ Shan ស្ថិតប៉ែកឦសានប្រទេស។ សេណារីយ៉ូថ្មីនេះក៏មិនមានការខុសប្លែកពីសេណារីយ៉ូមុនៗដែរ ពោលគឺជម្លោះរវាងសហគមន៍អ្នកកាន់សាសនាអ៊ីស្លាម និងអ្នកកាន់សាសនាព្រះពុទ្ធដែលមានចំនួនភាគច្រើននៅក្នុងប្រទេសភូមា។ អ្វីៗបានកើតឡើងដំបូង ដោយមានអ្នកកាន់សាសនាអ៊ីស្លាមម្នាក់បានធ្វើឲ្យរបួសឆេះរោលខ្លួន អ្នកកាន់សាសនាព្រះពុទ្ធម្នាក់។ ជនរងគ្រោះកំពុងសម្រាកព្យាលបាលក្នុងមន្ទីរពេទ្យជាមួយនឹងស្នាមរលាកលើ ដើមទ្រូង លើខ្នង និងដៃ តែជីវិតរបស់គេមិនស្ថិតក្នុងសភាពគ្រោះថ្នាក់ទេ។ គឺផ្តើមពីចំណុចនេះហើយ ដែលមានការផ្ទុះឡើងជាថ្មីនូវអំពើហិង្សារវាងសហគមន៍អ្នកកាន់សាសនា ទំាងពីរ រហូតដល់មានការដុតបំផ្លាញអគារ វិហារ និងមជ្ឈមណ្ឌលកុមាកំព្រារបស់អ្នកកាន់សាសនាអ៊ីស្លាម។
« ព្រឹត្តិការណ៍របៀបនេះនឹងមិនគួរកើតមានជាថ្មីនៅក្នុងសង្គម ប្រជាធិបតេយ្យដូចដែលយើងកំពុងព្យាយាមកសាងនាពេលបច្ចុប្បន្ននេះទេ » នេះជាការបញ្ជាក់របស់លោក Ye Htut អ្នកនំាពាក្យរបស់លោកប្រធានាធិបតីភូមាថេន សេន នៅក្នុងទំព័រ Facebook របស់ខ្លួន។ លោក Ye Htut បានបន្ថែមនៅក្នុងទំព័រ Facebook របស់លោក ដោយបានអំពាវនាវឲ្យគ្រប់គ្នាមានការអត់ធ្មត់ ចេះគ្រប់គ្រងដោយខ្លួនឯង និងធ្វើយ៉ាងណា ចៀសវាងកុំឲ្យកើតមានជាថ្មីនូវព្រឹត្តិការណ៍ដូចនៅក្រុង Lashio និងនៅតំបន់ផ្សេងៗទៀត។
គួរជម្រាបជូនថា កាលពីខែមីនាកន្លងទៅ អំពើហិង្សាសាសនាដូចគ្នានេះធ្លាប់បានកើតមានយ៉ាងសាហាវនៅក្នុង ស្រុក Meiktila ដោយបានបណ្តាលឲ្យមានមនុស្សស្លាប់ ៤៤នាក់ និងការដុតបំផ្លាញភូមិ ស្រុកទំាងមូលតែម្តង។ កាលពីឆ្នំា ២០១២ នៅតំបន់ប៉ែកខាងលិចប្រទេស អំពើហិង្សារវាងពួករ៉ាក់គីន អ្នកកាន់សាសនាព្រះពុទ្ធ និងពួករ៉ូហ៊ីងយ៉ា អ្នកកាន់សាសនាអ៊ីស្លាមបានផ្តាច់ជីវិតប្រមាណជា ២០០នាក់ និងមានអ្នករត់ចោលលំនៅដ្ឋាន ១៤ម៉ឺននាក់ផ្សេងទៀត។
ទំាងអស់នេះសុទ្ធសឹងជាព្រឹត្តិការណ៍ដែលបង្ហាញពីចលនាប្រឆំាង អ៊ីស្លាមនៅក្នុងប្រទេសមួយដែលប្រជាជនភាគច្រើនជា អ្នកកាន់សាសនាព្រះពុទ្ធ និងដែលជាផ្លូវការ មានអ្នកកាន់ សាសនាអ៊ីស្លាមតែ ៤% ប៉ុណ្ណោះ៕ដោយ គួច គន្ធារ៉ា (RFI)
