លោក ហ៊ុន សែន ព្រមានពីបាតុកម្ម ទូទាំងប្រទេស បើលោក កឹម សុខា មិនសុំទោស
Cambodia News
ភ្នំពេញ៖ ថ្លែងនៅក្នុងពិធីបញ្ចុះខណ្ឌសីមាវត្ដ មង្គលវត្ដ ក្នុងឃុំ គរ ស្រុក ត្បូងឃ្មុំ ខេត្ដ កំពង់ចាម នាព្រឹកថ្ងៃទី ៣០ ឧសភា នេះ លោកនាយករដ្ឋមន្ត្រី ហ៊ុន សែន បានលើកឡើងនឹងមានចលនាបាតុកម្ម ប្រជាជនផ្ទុះឡើង នៅទូទាំងប្រទេសកម្ពុជា បើសិនជាលោក កឹម សុខា មិនធ្វើការសុំទោសជាសាធារណៈ តាមការទាមទាររបស់អតីតអ្នកទោសគុកទួលស្លែង ចំពោះពាក្យជ្រុលជ្រូសរបស់លោក ដែលថា តឹកតាងទារុណកម្ម ដែលមាននៅសារមន្ទីរប្រល័យពូជសាសន៏ទួលស្លែង ជាការរៀបចំរបស់វៀតណាម ។
ជាមួយគ្នាសម្ដេចក៏បានថ្លែងការពារផងដែរដល់រដ្ឋាភិបាល និង គណបក្សប្រជាជនដោយថា បាតុកម្មដែលនឹងអាចកើតឡើង នាពេលដ៏ខ្លីខាងមុខនេះ វាមិនមែនជាចេតនារបស់រដ្ឋាភិបាលឬ ក៏បក្សប្រជាជនកម្ពុជាទេ តែវាជាការផ្ដើមចេញពីការខឹងសម្បារ របស់ប្រជាពលរដ្ឋខ្មែរទូទាំងប្រទេស ពិសេសលោក ជុំ ម៉ី និង លោក ប៊ូ ម៉េង ជាអតីតអ្នកទោសគុកទួលស្លែង ដែលរួចរស់ជីវិត ។
ចំពោះបណ្ហានេះកន្លងទៅ លោកនាយករដ្ឋមន្ត្រីក៏ធ្លាប់បានជម្រុញ ឲ្យសភា ស្នើច្បាប់ដើម្បីដាក់ទោសចំពោះជនទាំងឡាយណាដែលថា របបខ្មែរក្រហមពុំបានកាប់សម្លាប់មនុស្ស ។ជាការវាយបកវិញចំពោះការទាមទារនេះ នៅក្នុងសន្និសិទកាសែតមួយកាលពីម្សិលមិញ លោក កឹម សុខា ប្រធានស្ដីទីគណបក្សសង្គ្រោះជាតិ ដែលជាគណបក្សប្រឆាំង ក៏បាននធ្វើការទាមទារផងដែរថា រដ្ឋសភាត្រូវតែបង្កើតច្បាប់ ដាក់ទោសចំពោះអ្នកទាំងឡាយណា ដែលថា បើគណបក្សប្រជាជនចាញ់ឆ្នោត នឹង មានសង្គ្រាម ។
ទាក់ទងករណីដែលថា ទួលស្លែងជាគុកសិប្បនិម្មិត ត្រូវបានមេដឹកនាំបក្សប្រឆាំងរូបនេះច្រានចោល ហើយថាជាការកាត់តសម្លេង ។ ប៉ុន្តែយ៉ាងណាក៏ដោយ លោកនាយករដ្ឋមន្ត្រីបានបញ្ជាក់ថា បែប នេះ ទោះបីជា ក្រុមហ៊ុនភាពយន្ត ហូលីវូដ របស់អាមេរិក ក៏មិនអាចធ្វើកើតដែរ ៕
