ស្ត្រី ៣នាក់សន្លប់ក្នុងពេលអាជ្ញាធរបាញ់ទឹកបំបែកក្រុមបាតុករ
Cambodia News
ភ្នំពេញ ៖ នៅថ្ងៃ២៩ ឧសភានេះ ពលរដ្ឋមកពីសហគមន៍បឹងកក់ ថ្មគោល បុរីកីឡា ប្រមាណ ២០០នាក់ នាំគ្នាធ្វើបាតុកម្មបិទផ្លូវមហាវិថីព្រះមុនីវង្ស ចំណុចខាងមុខសាលារាជធានីភ្នំពេញ ដើម្បីសុំឲ្យអភិបាលរាជធានីភ្នំពេញ ថ្មី លោក ប៉ា សុជាតិវង្ស ដោះស្រាយបញ្ហាដីធ្លីរបស់ពួកគាត់ដែលបានអូសបន្លាយប្រមាណ ៥ឆ្នាំមកហើយ។
ចុងក្រោយ នគរបាលក្រុងភ្នំពេញ បានសម្រចប្រើប្រាសឡានទឹកចំនួន៣គ្រឿង បំបែកហ្វូងអ្នកតវ៉ា ដែលធ្វើឲ្យកកស្ទះចរាចរណ៏កំណាត់ផ្លូវ ព្រះមុនីវង្ស ខាងមុខសាលាក្រុងភ្នំពេញ ដែលធ្វើឲ្យសមាជិកនៃក្រុមអ្នកតវ៉ា យ៉ាងហោចណាស់២នាក់ដួលសន្លប់ ហើយម្នាក់ត្រូវបានដឹកទៅកាន់មន្ទីរពេទ្យ ។
មុនឈានដល់ការអនុវត្តវិធានការក្ដៅលោក ជួន សុវណ្ណ ស្នងការក្រុងភ្នំពេញ បានធ្វើការអំពាវនាវឲ្យក្រុមអ្នកតវ៉ា ដែលមកពីសហគមន៏ បឹងកក់ បុរីកីឡា និង ថ្មគោលទាំងនោះ ចាត់តំណាងចូលទៅធ្វើការដោះស្រាយក្នុងសាលាក្រុងភ្នំពេញ តែក្រុមអ្នកតវ៉ា បានបដិសេធ ហើយបានទាមទារឲ្យអភិបាលរាជធានីភ្នំពេញលោក ប៉ា សុជាតិវង្ស ចេញមុខមកតតាំង ចំពោះការសន្យាថា នឹងដោះស្រាយបញ្ហាដីធ្លី ឲ្យពួកគេយ៉ាងយូរ ក្នុងខែ ឧសភា នេះ ។
លោក ជួន សុវណ្ណ បានថ្លែងថា កម្លាំងទឹកពុំបានធ្វើឲ្យមានការរងគ្រោះធ្ងន់ធ្ងរទេ ។ គួរបញ្ជាក់ថា ក្រុមអ្នកតវ៉ា កាលពីព្រឹកមិញនេះ មានចំនួនប្រមាណជិត១រយនាក់ ខណៈដែលក្រុមសមត្ថកិច្ចមានគ្នា ជិត២រយនាក់ ៕