ពួកឧទ្ទាមម៉ៅនិយមបាញ់សម្លាប់មន្រ្តីជាន់ខ្ពស់របស់បក្សកាន់អំណាចឥណ្
ក្បួនរថយន្ត របស់គណបក្សកាន់អំណាចឥណ្ឌា ត្រូវបានពួកឧទ្ទាមម៉ៅនិយម ស្ទាក់វាយប្រហារ តាមផ្លូវ កាលពីថ្ងៃសៅរ៍ម្សិលមិញ ក្នុងរដ្ឋឆាទីហ្គា។ តាមតុល្យការចុងក្រោយ ដែលប៉ូលិសឥណ្ឌាបានផ្តល់នៅថ្ងៃអាទិត្យនេះ មាន មនុស្ស២៣នាក់ ស្លាប់ និងជាង៣០នាក់ផ្សេងទៀតរងរបួសធ្ងន់ធ្ងរ។
ប្រធានគណបក្សសមាជថ្នាក់ជាតិ លោកស្រីSonia Ghandiបានសំដែងក្តីរន្ធត់ និងទុក្ខព្រួយដែលមន្រ្តីជាន់ខ្ពស់របស់គណបក្សលោកស្រីត្រូវរងគ្រោះ ដោយក្រុមឧទ្ទាមម៉ៅនិយម។
ហេតុការណ៍បានកើតឡើង នៅថ្ងៃសៅរ៍ម្សិលមិញ នៅលើដងផ្លូវក្នុងព្រៃស្រោងក្នុងរដ្ឋឆាទីហ្គា នៅពេលដែលក្បួនរថយន្តរបស់គណបក្សកាន់អំណាច ដែលទើបមកធ្វើការឃោសនាគណបក្ស បានឈប់ទុចង៉ក់ដោយសារឈើរលំឃាំងផ្លូវ។ រថយន្តទីមួយបានរងដោយគ្រាប់មីន ហើយ មួយសន្ទុះក្រោយមក ក្រុមឧទ្ទាមម៉ៅនិយមប្រមាណ២០០នាក់បានចេញពីក្នុងព្រៃ និងបើកការបាញ់រះទៅលើក្បួនរថយន្ត។
ក្នុងចំណោមអ្នករងគ្រោះស្លាប់ គេឃើញមានមន្រ្តីជាន់ខ្ពស់ របស់គណបក្សកាន់អំណាចប្រចាំរដ្ឋឆាទីហ្គា ប៉ូលិស៥នាក់ និងអ្នកគាំទ្រគណបក្ស។ អ្នកតំណាងរាស្រ្តសំខាន់ម្នាក់ គឺលោកម៉ាហិនដ្រា កូមា ជាអតីតរដ្ឋមន្រ្តីក្រសួងមហាផ្ទៃ និងជាអ្នកបង្កើតសាលាហ្វឹកហាត់ដើម្បីប្រយុទ្ធប្រឆាំងនឹងក្រុមម៉ៅនិយម ក្នុងខេត្តភាគត្បូងឥណ្ឌា។ ក្រុមឧទ្ទាមម៉ៅនិយម ដែលពេលនេះ មានវត្តមានក្នុងរដ្ឋ២០ ក្នុងចំណោមរដ្ឋឥណ្ឌាសរុប ២៧ តែងតែលបឆ្មក់វាយប្រហារលើប៉ូលិសឥណ្ឌា ក្នុងបុព្វហេតុទាមទារការងារ និងដីធ្លីសម្រាប់កសិករ និងប្រជាជនក្រីក្រឥណ្ឌា។
ប៉ុន្តែ លោកនាយករដ្ឋមន្រ្តីឥណ្ឌាម៉ាន់មូហាស៊ីង ដែលត្រូវធ្វើដំណើរ នៅថ្ងៃអាទិត្យនេះ ទៅរដ្ឋឆាទីហ្គា ជាមួយលោកស្រី Sonia Ghandi ប្រធានគណបក្សសមាជជាតិឥណ្ឌា បានចាត់ទុកពួកឧទ្ទាមម៉ៅនិយម ថា ជាក្រុមដែលគ្រោះថ្នាក់ធំបំផុតសម្រាប់សន្តិសុខជាតិ៕ដោយ ឈាង បុប្ (RFI)