នារីម្នាក់ស្លាប់ ដោយសារធ្លាក់ពីលើទងយោងម៉ាស៊ីន កម្សាន្ត ក្នុងមជ្ឈមណ្ឌលឌ្រីមលែន
ហេង នាង
Cambodia News
ភ្នំពេញ៖ កាលពីល្ងាចម៉ោង ៦នឹង៤០នាទី ថ្ងៃទី២១ ខែឧសភា នារីម្នាក់បានស្លាប់បាត់បង់ជីវិតភ្លាមៗ ក្រោយពីបញ្ជូនទៅដល់មន្ទីរពេទ្យ បន្ទាប់ពីនារីរូបនេះ បានធ្លាក់ពីលើទងយោងម៉ាស៊ីន កម្សាន្ត Twin Twister ក្នុងមជ្ឈមណ្ឌលឌ្រីមលែន ស្ថិតនៅសង្កាត់ចតុមុខ ខណ្ឌដូនពេញ។
តាមប្រភពព័ត៌មានក្នុងស្រុកបានអោយដឹងថា ស្ត្រីរងគ្រោះ ឈ្មោះ គឹម គង្គា អាយុ ៣៣ឆ្នាំ ជាអ្នកមើលថែក្មេង នៅអង្គការ ស្ថិតក្នុងភូមិជ្រោយអំពិល ស្រុកគៀនស្វាយ ខេត្តកណ្តាល។ ស្ត្រីរងគ្រោះ មានស្រុកកំណើតភូមិព្រះពន្លា ភូមិសង្ឃ័រ ស្រុកស្វាយទាប ខេត្តស្វាយរៀង។
ប្រភពព័ត៌មាននៅកន្លែងកើតហេតុបានឲ្យដឹងថា មុនកើតហេតុគេឃើញ នារីវ័យជាង២០ឆ្នាំម្នាក់ ចូលទៅលេងកម្សាន្តនៅក្នុងកន្លែងកម្សាន្តឌ្រីមលែន ហើយបានឡើងទៅជិះទ្វីនទ្វីសស្ទ័រ(ទោងយោលភ្លោះ) ដែលមានកំពស់ជាង១០ម៉ែត្រ លុះប្រមាណ១០នាទីក្រោយ ស្រាប់តែរបូតដៃធ្លាក់ចុះទៅដីបណ្តាលឲ្យរងរបួសធ្ងន់ធ្ងរ ហើយស្លាប់បាត់បង់ជីវិត ក្រោយពីបញ្ជូនទៅដល់មន្ទីរពេទ្យ។
ក្រោយពីកើតហេតុ ខាងសន្តិសុខ ឌ្រីមលែន បានរារាំង មិនឲ្យអ្នកយកព័ត៌មាន ចូលទៅកាន់កន្លែងកើតហេតុទេ៕
