ក្រសួងការងារ នឹងចាត់វិធានការជាថ្មីម្តងទៀតទៅលើបណ្តារោងចក្រនៅកម្ពុជា
Cambodia News
ភ្នំពេញ៖ ក្នុងសន្និសីទសារព័ត៌មាន នៅព្រឹកថ្ងៃអង្គារ ទី២១ ខែឧសភានេះ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ លោក អ៊ុំ មាន មានប្រសាសន៍ថា ក្រសួងការងារ នឹងចាត់វិធានការត្រួតពិនិត្យតឹងរ៉ឹងសាជាថ្មីម្តង ទៀត លើបណ្តាសហគ្រាស និងរោងចក្រ ដើម្បីធានាសុវត្ថិភាពដល់កម្មករនិយោជិត និងបង្ការហានិភ័យការងារផ្សេង។
លោក អ៊ុំ មាន បន្តថា បន្ទាប់ពីមានហេតុការណ៍កើតឡើងនៅរោងចក្រ Wing Star Shoes កត្តាសុវត្ថិភាពរបស់កម្មករ នៅតែជាបញ្ហាចំបងនៅកម្ពុជា។ ដូច្នេះក្រសួងការងារ នឹងសហការជាមួយសមាគមរោងចក្រកាត់ដេរនៅកម្ពុជា(GMAC) ចុះអធិការកិច្ចសាជាថ្មីម្តងទៀត លើគ្រប់រោងចក្រ សហគ្រាសទាំងអស់នៅកម្ពុជា។
វិធានការអធិការកិច្ចនេះ ធ្វើឡើង បន្ទាប់ពីមានហេតុការណ៍គ្រោះថា្នក់បាក់ធ្នើឡៅតឿ នៅរោងចក្រស្បែកជើង វីងស្តារហ្ស៊ូ (Wing Star Shoes) ខេត្តកំពង់ស្ពឺ កាលពីសប្តាហ៍មុន ដែលបណ្តាលឲ្យមនុស្ស ២នាក់ស្លាប់ និង១២នាក់ផ្សេងទៀត រងរបួសធ្ងន់ និងការឆ្លងចរន្តអគ្គិសនីនៅរោងចក្រនេះ ដែលបណ្តាលឲ្យកម្មករ ប្រមាណ២០នាក់សន្លប់ កាលថ្ងៃចន្ទ ទី២០ ខែឧសភា៕