រថយន្តពីរគ្រឿងបុកគ្នាពេញទំហឹងគាបជាប់មនុស្ស ៧នាក់របួសធ្ងន់
Cambodia News
ភ្នំពេញ៖ កាលពីវេលាម៉ោង ១១នឹង៤០នាទីយប់ ថ្ងៃទី១៦ ឧសភា មានឧប្បវហេតុគ្រោះថ្នាក់ចរាចរណ៍មួយដ៏គួរឲ្យរន្ធត់ ដែលបង្កឡើងដោយសាររថយន្តពីរគ្រឿង បុកគ្នាពេញទំហឹង នៅតាមបណ្តោយផ្លូវព្រៃស ស្ថិតក្នុងសង្កាត់ពងទឹក ខណ្ឌដង្កោ។
តាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេបានសង្កេតឃើញរថយន្តមួយគ្រឿងម៉ាក តាកូម៉ា ពណ៌ទឹកប្រាក់ ពាក់ស្លាកលេខ 2F-2572 បើកបរតាមបណ្តោយផ្លូវព្រៃស ក្នុងទិសដៅពីលិចទៅកើត ខណៈបើកមកដល់ចំណុចជិតស្នាក់ការប៉ុស្តិ៍ពងទឹក ក៏បានជ្រុលទៅបុករថយន្តកូរ៉េ១តោនកន្លះមួយគ្រឿង ពណ៌ឈាមជ្រូក ដែលកំពុងបើកបរបញ្ច្រាសទិសគ្នា បណ្តាលឲ្យក្បាលរថយន្តទាំងពីររួញជាប់គ្នា និងម្ចាស់រថយន្តទាំង៧នាក់បានរងរបួសធ្ងន់ធ្ងរ ត្រូវរថយន្តសាមុយដឹកយកទៅសង្គ្រោះនៅមន្ទីរពេទ្យភ្លាមៗ។
សមត្ថកិច្ចនៅមិនទាន់បញ្ជាក់ពីអត្តសញ្ញាណជនរងគ្រោះទាំង៧នាក់ ខាងលើនេះនៅឡើយទេ ដោយសារក្រោយពេលកើតហេតុ ជនរងគ្រោះត្រូវបញ្ជូនទៅសង្គ្រោះនៅមន្ទីរពេទ្យភ្លាមៗ។ ក្រោយពេលកើតហេតុ សមត្ថកិច្ចមូលដ្ឋាន និងនគរបាលចរាចរណ៍ បានចុះមកអន្តរាគមន៍វាស់វែង ដកហូតរថយន្តទាំងពីរគ្រឿងទៅកាន់អធិការដ្ឋាននគរបាលខណ្ឌដង្កោ ដើម្បីចាត់ការតាមនីតិវីធីច្បាប់៕ ហេង នាង
