ពលរដ្ឋដែលមានបញ្ហាដីធ្លីព្រមានមកដេកនៅមុខសាលារាជធានីភ្នំពេញ
Cambodia News
ភ្នំពេញ៖ នាព្រឹកថ្ងៃទី១៦ ខែឧសភានេះ ពលរដ្ឋដែលមានបញ្ហាដីធ្លី ប្រមាន១០០នាក់ មកពីតំបន់បុរីកីឡា ថ្មគោល បឹងកក់ សហគមន៍៣៤៧ ភូមិឃ្លាំងសាំង ភូមិ២៣ សហគមន៍៤២ និងអតីតអ្នកបុរីកីឡា បានធ្វើការព្រមានថា ប្រសិនបើអភិបាលរាជធានីភ្នំពេញ ដែលទើបឡើងកាត់តំណែងថ្មី មិនដោះស្រាយជម្លោះដីដ៏រាំរ៉ៃនោះ ឲ្យបានចប់មុនការបោះឆ្នោតជាតិទេនោះ ពួកគេនឹងនាំគ្នាមកដេកនៅមុខសាលារាជធានីភ្នំពេញ ។
តំណាងសហគមន៍បុរីកីឡា លោក ពេជ្យ លឹមឃួន មានប្រសាសន៍ថា លោកប៉ា សុជាតិវង្ស បានសន្យាជាមួយពលរដ្ឋនឹងចុះដោះស្រាយ ក្រោយព្រះរាជពិធីបុណ្យចម្រើនព្រះជន្មព្រះមហាក្សត្រ តែមកដល់ថ្ងៃនេះ លោកមិនបានធ្វើតាមការសន្យាទេ។
តំណាងសហគមន៍បឹងកក់ អ្នកស្រី ទេព វន្នី ដែលជាម្ចាស់ពានរង្វាន់ការពារសិទ្ធិដីធ្លី បានជំរុញឲ្យអភិបាលថ្មី លោក ប៉ា សុជាតិវង្ស ដោះស្រាយបញ្ហាជួនពលរដ្ឋ ជាជាងឲ្យគណបក្សប្រជាជនកម្ពុជាគ្រាន់តែចែកសារ៉ុង និងសន្យាខ្យល់មុនពេលបោះឆ្នោត។
ទោះជាយ៉ាងណានៅព្រឹកនេះ លោកប៉ា សុជាតិវង្ស អភិបាលរាជធានីភ្នំពេញ មិនបានចេញមកដោះស្រាយទេ ដោយគ្រាន់តែមានមន្ត្រីរដ្ឋបាលមកទទួលញត្តិ ហើយសន្យាថានឹងប្រគល់ជួនលោកអភិបាលពិនិត្យ៕