យុវជនម្នាក់ស្លាប់ដោយសារបើកម៉ូតូទៅបុកបង្គោលភ្លើង
Cambodia News
ភ្នំពេញ៖ កាលពីម៉ោង២និង១០នាទីរំលងអធ្រាត្រ ឈានចូលថ្ងៃទី១៤ ខែឧសភា យុវជនម្នាក់ជិះម៉ូតូលឿន ហើយជ្រុលទៅបុកបង្គោលភ្លើងពេញទំហឹង បណ្តាលឲ្យបោកក្បាលនឹងថ្នល់ ជាប់ជើងនឹងម៉ូតូ ស្លាប់នៅកន្លែងកើតហេតុ ស្ថិតនៅត្រង់ចំណុចផ្លូវលេខ៤០២ប្រសព្វនឹងផ្លូវលេខ១៧៣ ស្ថិតក្នុងក្រុម៧ ភូមិ១ សង្កាត់ទំនប់ទឹក ខណ្ឌចំការមន។
ប្រភពព័ត៌មានពីសមត្ថកិច្ចបានឲ្យដឹងថា មុនពេលកើតហេតុយុវជនរងគ្រោះជិះម៉ូតូឃ្លីក ពណ៌ខ្មៅ ពាក់ស្លាកលេខ ភ្នំពេញ 1BO-0561 តាមបណ្តោយផ្លូវលេខ១៧២ ក្នុងទិសដៅពីជើងទៅត្បូង លុះទៅដល់ចំណុចកើតហេតុ ក៏បោះពួយទៅបុកផើងដាំដើមដូងបែកអស់៣ផើង រួចបន្តទៅបុកនឹងបង្គោលភ្លើងពេញទំហឹង បណ្តាលឲ្យបោកក្បាលទៅនឹងថ្នល់ស្លាប់នៅនឹងកន្លែង។
ក្រោយកើតហេតុ សាកសពជនរងគ្រោះ ត្រូវសមត្ថកិច្ចដឹកយកទៅតម្កល់ទុកនៅវត្តទឹកថ្លា ចំណែកម៉ូតូត្រូវសមត្ថកិច្ចយកទៅរក្សាទុកនៅការិយាល័យនគរបាលចរាចរណ៍ រាជធានីភ្នំពេញ៕ ហេង នាង
