ប្រជាពលរដ្ឋចំនួន ៥៦នាក់ពុលម្ហូបក្នុងពិធីមង្គលការ
Cambodia News
ឧត្តរមានជ័យ ៖ កាលពីថ្ងៃទី១៣ ខែឧសភា ឆ្នាំ២០១៣ នៅភូមិបុស្បូវ សង្កាត់បុស្បូវ ក្រុងសំរោង ខេត្តឧត្តរមានជ័យ ប្រជាពលរដ្ឋចំនួន៥៦នាក់ ពុលម្ហូបអាហារហេតុការនេះ កើតឡើងនៅក្នុងពិធីមង្គលការមួយនៅក្នុងភូមិខាងលើ។
តាម ប្រភពព័ត៌មាន ពីផ្ទះកើតហេតុបានបញ្ជាក់ថា ដោយគ្រួសារ មានសភាពខ្វះខាតធន់ធានទ្រព្យសម្បត្តិ ក៏នាំគ្នាធ្វើម្ហូបអាហារខ្លួនឯង សំរាប់ទទួលភ្ញៀវ តែបានទិញសំភារៈមកពីផ្សារ យកមកផ្សំធ្វើម្ហូប។បន្ទាប់ពីបានពិសារបាយនៅវេលាម៉ោង១០ ទៅ១១ព្រឹកថ្ងៃទី១៣នេះ មានប្រជាពលរដ្ឋមួយចំនួនធំបានចាប់ផ្ដើមមានអាការះពុលចំណី ហើយក៏ចាប់ផ្ដើមពុលពីម្នាក់ទៅម្នាក់សុទ្ធតែបានទៅចូលរួមពិសារ បាយក្នុងពិធីមង្គលការនោះទាំងអស់ ហើយក៏បានដឹកមកកាន់មណ្ឌលសុខភាពបុស្បូវ ដើម្បីពិនិត្យរកមូលហេតុ។
តាមការបញ្ជាក់របស់លោក គ្រូពេទ្យនៅមណ្ឌលសុខភាពបានបញ្ជាក់ថា ប្រជាពលរដ្ឋដែលពុលម្ហូប អាហារនោះមានអាការៈ ក្អួតចង្អោរ វិលមុខ ឡើងកំដៅហើយអ្នកទាំងនោះសុទ្ធតែបានហូបនូវ ម្ហូបមួយមុខដូចគ្នាគឺម្ហូបញាំបន្លែស្រស់ តាមការសនិដ្ឋានជំហានដំបូងបានបញ្ជាក់ថា មកពី ម្ហូបដែលធ្វើខ្វះអនាម័យ និងមានជាតិគីមីលើបន្លែ។
បន្ទាប់ពីទទួលបានព័ត៌មានពីហេតុការណ៍ ខាងលើឯកឧត្តម លៀម សុដា អភិបាលខេត្ត ស្ដីទី បានដឹកនាំកម្លាំង និងក្រុមគ្រូពេទ្យចុះទៅ ពិនិត្យដល់កន្លែងកើតហេតុ និងជួយពិនិត្យនៅមណ្ឌលសុខភាពដោយឃើញប្រជាពលរដ្ឋមួយ ចំនួនពុលមានសភាពធ្ងន់ធ្ងរ ក៏បានបញ្ជូនមកកាន់មន្ទីរពេទ្យបង្អែកខេត្តបន្ត ដើម្បីព្យាបាលឲ្យ បានទាន់ពេលវេលា៕
