បុរសម្នាក់បើរថយន្តបុករះម៉ូតូ ៧គ្រឿង និងបុកស្ត្រីម្នាក់ស្លាប់
Cambodia News
ភ្នំពេញ ៖ កាលពីម៉ោង ១៧ និង១០នាទីរសៀល ថ្ងៃទី៨ ខែឧសភា រថយន្តឡង់គ្រីស័រមួយគ្រឿងបានបុករះម៉ូតូ ៧គ្រឿង និងបុកអ្នកលក់ប្រហិតស្លាប់ម្នាក់ ស្ថិតនៅត្រង់ចំណុច ខាងមុខមន្ទីរសម្រាកព្យាបាល និងសម្ភព គឹមសុខ លើកំណាត់ផ្លូវ១៣៨ សង្កាត់ផ្សារដេប៉ូពីរ ខណ្ឌទួលគោក ។
ព័ត៌មានពីសាក្សីឃើញហេតុការណ៍ បានឲ្យដឹងថា មុនពេលកើតហេតុ រថយន្តឡង់គ្រីស័រ ពណ៌សំបកឪឡឹក ពាក់ស្លាកលេខ ភ្នំពេញ 2L-2795 បានបោះពួយ តាមបណ្តោយផ្លូវលេខ១៣៨ ក្នុងទិសដៅពីលិច ទៅកើត លុះដល់ចំណុចកើតហេតុ ស្រាប់តែ រថយន្តបង្ក រេចង្កូតទៅបុកម៉ូតូ៧គ្រឿង ហើយជ្រុលទៅបុក អ្នកលក់ប្រហិតជនជាតិវៀតណាមម្នាក់ ឈ្មោះ វីន ថេង ភេទស្រី ស្លាប់នៅនឹងកន្លែង។
ជនបង្ក ដែលបើបររថយន្តឡង់គ្រីស័របុករះម៉ូតូ ៧គ្រឿង និងបុកអ្នកលក់ប្រហិតស្លាប់ត្រូវបានគេដឹងថា មានឈ្មោះ ស្រេង សុខា ភេទប្រុស អាយុ៤១ឆ្នាំ ស្នាក់នៅផ្ទះជួល ខណ្ឌសែនសុខ ។ក្រោយពេលកើតហេតុ ជនសង្ស័យត្រូវបញ្ជូនខ្លួន ទៅកាន់ស្នងការនគរបាលរាជធានីភ្នំពេញ ដើម្បីដោះស្រាយទៅតាមផ្លូវច្បាប់៕ ហេង នាង
