គ.ជ.ប ជម្រុញឲ្យបក្សនយោបាយរូតរះចុះឈ្មោះគណបក្ស និងបេក្ខភាពតំណាងរាស្ត្រ
Cambodia News
ភ្នំពេញ៖ កាលពីថ្ងៃទី០៦ ឧសភា ២០១៣ គណកម្មាធិការជាតិរៀបចំការបោះឆ្នោត (គ.ជ.ប)បានដាក់ការជម្រុញដល់បណ្ដាគណបក្សនយបាយ ក្នុងប្រទេសកម្ពុជា ឲ្យរូតរះចុះឈ្មោះ គណបក្ស និង បេក្ខភាពតំណាងរាស្ត្ររបស់ខ្លួន សម្រាប់ការប្រកួតប្រជែង ការបោះឆ្នោតជាតិនីតិកាលទី៥ នាថ្ងៃទី ២៨ ខែ កក្កដា ខាងមុខនេះ ។
លោក ទេព នីថាអគ្គលេខាធិការ គ.ជ.ប បានថ្លែងថា ឈានចូលដល់សប្ដាហ៏ទីពីរហើយ នៃការចុះបញ្ជីឈ្មោះគណបក្សបោះឆ្នោត និង ចុះបញ្ជីបេក្ខជនបោះឆ្នោត ដែលមានរយៈពេល១៥ ថ្ងៃ ផ្ដើមពីថ្ងៃទី ២៩ មេសា ដល់ថ្ងៃទី ១៣ ខែ ឧសភា ឆ្នាំ ២០១៣។
បើតាម គ.ជ.ប ឲ្យដឹងថា រហូតមកដល់ពេលនេះ មានតែគណបក្សនយោបាយ ៥ ប៉ុណ្ណោះ បានចុះបញ្ជីឈ្មោះបោះឆ្នោត នោះគឺគណបក្សប្រជាជនកម្ពុជា , គណបក្សហ្វុនស៊ិនប៉ិច , គណបក្សសញ្ជាតិកម្ពុជា , គណបក្សសាធារណរដ្ឋប្រជាធិបតេយ្យ និង គណបក្សសម្ព័ន្ធសាធារណៈរដ្ឋ ដើម្បីប្រជាធិបតេយ្យ ។
លោក កឹម សុខា ប្រធានគណបក្សសង្គ្រោះជាតិ ដែលជាគបក្សប្រឆាំងធំ ក្នុងប្រទេសកម្ពុជា បានថ្លែងឲ្យដឹង កាលពីពេលថ្មីៗនេះថា បើទោះបីជាគណបក្សនេះ មិនទាន់បានបញ្ជូនសំណុំឯកសារទៅឲ្យ គ.ជ.ប ក្ដី ប៉ុន្តែខ្លួនបានត្រៀមលក្ខណៈរួចជាស្រេចហើយ ដើម្បីចូលរួមប្រកួតប្រជែងក្នុងការបោះឆ្នោតនាពេលខាងនេះ៕
