ចលនាប្រឆំាងពួកអ្នកកាន់សាសនាអ៊ីស្លាមកំពុងបន្តកើតមាននៅក្នុងប្រទេសភូមា
ចលនាប្រឆំាងពួកអ្នកកាន់សាសនាអ៊ីស្លាម កំពុងបន្តកើតមាននៅក្នុងប្រទេសភូមា។ នៅល្ងាចថ្ងៃអង្គារ ទី៣០ មេសាម្សិលមិញ អំពើហិង្សារវាងអ្នកកាន់សាសនាអ៊ីស្លាម និងអ្នកកាន់សាសនាព្រះពុទ្ធបានបណ្តាលឲ្យស្លាប់មនុស្សម្នាក់ និងរងរបួសប្រមាណជា ១០នាក់ផ្សេងទៀត។ ទន្ទឹមគ្នានេះ នៅមានការដុតបំផ្លាញវិហារអ៊ីស្លាម និងផ្ទះសម្បែងជាច្រើនទៀតផង។ អ្វីជាការកត់សម្គាល់ ការវាយប្រហារលើពួកអ្នកកាន់សាសនាអ៊ីស្លាមពេលនេះបានកើតមានឡើង មួយខែក្រោយពីមានអំពើហិង្សាដូចគ្នានេះនៅកន្លែងផ្សេងទៀតក្នុង ទូទំាងប្រទេស។
បើយោងតាម ព័ត៌មានផ្លូវការផ្តល់ដោយប៉ូលិសភូមា ព្រឹត្តិការណ៍ដុតបំផ្លាញវិហារអ៊ីស្លាម ផ្ទះសម្បែង ព្រមទំាងហាងលក់ទំនិញនៅជុំវិញនោះបានកើតមាននៅក្នុងស្រុក Oakkan ស្ថិតនៅចម្ងាយប្រមាណជា ១០០គីឡូម៉ែត្រប៉ែកខាងត្បូងទីក្រុងរ៉ង់ហ្គូន។ តាមពិតទៅ និងបើផ្អែកតាមព័ត៌មានចុះផ្សាយលើគេហទំព័ររបស់ក្រសួងព័ត៌មានឲ្យ ដឹងថា អំពើហិង្សាបានផ្តើមផ្ទុះឡើង ក្រោយពីមានស្រ្តីម្នាក់ត្រូវបានគេរុញច្រានដោយសារគ្រោះថ្នាក់ ជាមួយលោកសង្ឃមួយអង្គមានព្រះជន្ម ១១ព្រះវស្សា។ នៅក្នុងព្រឹត្តិការណ៍នោះ លោកសង្ឃអង្គនោះក៏បានបោះបង់ចោលបាតលោក ដែលបន្ទាប់មក បាតលោកនោះក៏បានប្រេះស្រំាទៀត។
កើត ចេញពីឧប្បត្តិហេតុខាងលើ ស្រាប់តែមានជនមួយក្រុមពី ២០០ ទៅ ៣០០នាក់បានទៅដល់កន្លែងនោះដោយជិតម៉ូតូ រួចហើយក៏នំាគ្នាបើកការវាយប្រហារ ដុតបំផ្លាញលើវិហារអ៊ីស្លាម ផ្ទះសម្បែង ព្រមទំាងហាងទំនិញមួយចំនួនដែលនៅជុំវិញទីនោះ។ យោងតាមសាក្សីជនជាតិអ៊ីស្លាមម្នាក់អាយុ ៤៨ឆ្នំាដែលបានឃើញហេតុការណ៍ផ្ទាល់នឹងភ្នែកឲ្យដឹងថា អ្នកស្រុក អ្នកភូមិទំាងអស់បាននំាគ្នាចាកចេញពីលំនៅដ្ឋានរបស់គេអស់ហើយ ដោយខ្លាចក្រុមជនទំាងនោះសម្លាប់ពួកគេចោល។ ភ្លាមៗ ក្រុមកម្លំាងសន្តិសុខក៏បានចេញធ្វើអន្តរាគមន៍ដោយធ្វើការបាញ់គំរាម ដើម្បីបំបែកហ្វូងក្រុមជនបះបោរ។
រហូតមកដល់ពេលនេះ អំពើហិង្សាបានបណ្តាលឲ្យស្លាប់មនុស្សម្នាក់ និងរងរបួសប្រមាណជា ១០នាក់ផ្សេងទៀត។ ទន្ទឹមគ្នានេះ មានមនុស្ស ១៨នាក់ត្រូវបានប៉ូលិសចាប់ខ្លួននៅក្នុងស្រុកចំនួន ៤។ រីឯសន្តិសុខនៅក្នុងស្រុក Oakkan ក៏ត្រូវបានពង្រឹងដែរ។
គួរជម្រាបជូនថា កាលពីខែមីនាកន្លងទៅ អំពើហិង្សាសាសនាដូចគ្នានេះធ្លាប់បានកើតមានយ៉ាងសាហាវនៅក្នុង Meiktila ដោយបានបណ្តាលឲ្យមានមនុស្សស្លាប់ ៤៣នាក់ និងការដុតបំផ្លាញភូមិ ស្រុកទំាងមូលតែម្តង។ ដើមរឿងដំបូងកាលណោះបានកើតចេញពីជម្លោះរវាងអ្នកលក់ម្នាក់កាន់សាសនា អ៊ីស្លាម និងអ្នកទិញម្នាក់កាន់សាសនាព្រះពុទ្ធ។ អំពើហិង្សាបានជម្រុញឲ្យមានអន្តរាគមន៍ពីសំណាក់ទាហានភូមា។ កាលពីឆ្នំា ២០១២ នៅតំបន់ប៉ែកខាងលិចប្រទេស អំពើហិង្សារវាងពួករ៉ាក់គីន អ្នកកាន់សាសនាព្រះពុទ្ធ និងពួករ៉ូហ៊ីងយ៉ា អ្នកកាន់សាសនាអ៊ីស្លាមបានផ្តាច់ជីវិតប្រមាណជា ២០០នាក់ និងមានអ្នករត់ចោលលំនៅដ្ឋាន ១៤ម៉ឺននាក់ផ្សេងទៀត។
ទំាងអស់នេះសុទ្ធសឹងជាព្រឹត្តិការណ៍ដែលបង្ហាញពីចលនាប្រឆំាង អ៊ីស្លាមនៅក្នុងប្រទេស មួយដែលប្រជាជនភាគច្រើនជា អ្នកកាន់សាសនាព្រះពុទ្ធ និងដែលជាផ្លូវការ មានអ្នក កាន់សាសនាអ៊ីស្លាមតែ ៤% ប៉ុណ្ណោះ៕ដោយ គួច គន្ធារ៉ា (RFI)