នាយករដ្ឋមន្ត្រីស៊ីរីរួចជីវិតពីភេរវកម្មបំផ្ទុះរថយន្ត
នៅ ថ្ងៃចន្ទនេះ នៅក្រុងដាម៉ាស ប្រទេសស៊ីរី នាយករដ្ឋមន្ត្រីលោក Waël al-Halaqi បានរួចផុតជីវិតពីអំពើភេរវកម្ម ដែលបានវាយប្រហារទៅលើក្បួនរថយន្តរបស់លោក។ នាយករដ្ឋមន្ត្រីស៊ីរីមិនបានរងរបួសអ្វីទេ ប៉ុន្តែភេរវកម្មបំផ្ទុះរថយន្តនេះបានសម្លាប់អង្គរក្សរបស់លោកម្នាក់ និងធ្វើអោយមនុស្សពីរនាក់ទៀតរងរបួស។
ភេរវកម្ម បំផ្ទុះរថយន្តដែលបានកើតឡើងនៅក្រុងដាម៉ាស ប្រទេសស៊ីរី នៅថ្ងៃចន្ទនេះ គឺមានគោលដៅវាយប្រហាររថយន្តរបស់នាយករដ្ឋមន្ត្រីលោក Waël al-Halaqi។ ប៉ុន្តែ វាមិនបាន ប៉ះពាល់ទៅលើលោក al-Halaqi នោះទេ។ អង្គរក្សរបស់លោកម្នាក់បានស្លាប់បាត់បង់ជីវិតក្នុងអំពើភេរវកម្មនេះ ហើយអង្គរក្សម្នាក់ទៀត និងអ្នកបើកបររថយន្តរបស់លោក បានរងរបួសធ្ងន់ធ្ងរ។
ភេរវកម្មបំផ្ទុះរថយន្តនេះ បានកើតឡើងនៅជិតសួនច្បារសាធារណៈមួយកន្លែង និងសាលារៀន Mazzé ស្ថិតក្នុងសង្កាត់ដែលមានការការពារសុវត្ថិភាពសន្តិសុខខ្ពស់។ នៅទីនោះ គឺជាទីតាំងនៃអគាររដ្ឋាភិបាល ទីស្នាក់ការផ្នែកចារកិច្ចស៊ីរី ព្រមទាំងស្ថានទូតបណ្តាប្រទេសនានាផងដែរ។
ភេរវកម្មបំផ្ទុះនេះ ប្រហែលជាត្រូវបានគេបញ្ជាដោយឧបករណ៍តេឡេកុំម៉ង់ពីចំងាយ។ គួររំលឹកថា នៅខែសីហា ឆ្នាំ២០១២ លោក Waël al-Halaqi បានឡើងកាន់តំណែងជានាយករដ្ឋមន្ត្រីបន្តពីលោក Riad Hijab។ លោក Riad Hijab គឺជាអ្នកប្រឆាំងនឹងការសម្លាប់រង្គាលនៃរបបក្រុងដា ម៉ាស នៅក្នុងចលនាបះបោរនៅស៊ីរី កាលពីខែមិនា ឆ្នាំ២០១១។
អំពើភេរវកម្មនៅក្រុងដាម៉ាសលើកចុងក្រោយមុននេះ បានកើតឡើង កាលពីថ្ងៃ៩មេសា កន្លង ទៅ ដោយបានសម្លាប់មនុស្ស១៥នាក់។ រដ្ឋាភិបាលលោកអាសាដ បានចោទថា “ក្រុមភេរករ” ជាអ្នកបង្កអំពើភេរវកម្ម។ ពាក្យថា”ក្រុមភេរករ” ដែលបានប្រើប្រាស់ដោយរបបក្រុងដាម៉ាស គឺសំដៅទៅលើក្រុមឧទ្ទាមដែលប្រឆាំងនឹងការគ្រប់គ្រងរបស់លោក អាសាដ។ ក្រុមឧទ្ទាមស៊ីរីទទួលបានជំនួយពីក្រុមជីហាដដែលជាក្រុម ដែលតែងបង្កភេរវកម្មនៅស៊ីរី។
ដោយឡែក ជុំវិញការសង្ស័យថារបបក្រុងដាម៉ាសបានប្រើប្រាស់អាវុធគីមីនោះ អ្នកស៊ើបអង្កេតនៃអង្គការសហប្រជាជាតិកំពុងតែធ្វើការប្រមូលភស្តុតាង នៅក្រៅប្រទេសស៊ីរី។ រដ្ឋាភិបាលស៊ីរីនៅតែបន្តហាមប្រាមមិនអោយអ្នកស៊ើបអង្កេតចូលទៅកាន់ ទឹកដីខ្លួន។
នៅថ្ងៃចន្ទនេះ នៅក្រុង New York អ្នកវិទ្យាសាស្ត្រជនជាតិស៊ុយអែដ Ake Sellstrom ដែលត្រូវបានអង្គការសហប្រជាជាតិ តែងតាំងជាអ្នកដឹកនាំបេសកមកម្មស៊ើបអង្កេតនេះ កាលពីចុងខែមិនាកន្លងទៅនោះ នឹងជួបពិភាក្សាជាមួយអ្នកទទួលខុសត្រូវនានារបស់អង្គការសហប្រជាជាតិ ជុំវិញបញ្ហាអាវុធគីមីនេះ។ លោកAke Sellstrom ធ្លាប់បានទៅក្រុងLondres រួចហើយ ដើម្បីប្រមូលព័ត៌មានទាក់ទងនឹងការសង្ស័យរបស់បណ្តាបស្ចិមប្រទេសលើ អាវុធគីមីនេះ។
កន្លងមក បារាំងនិងអង់គ្លេសបានរាយការណ៍ទៅអង្គការសហប្រជាជាតិថា មានភស្តុតាងបញ្ជាក់ថា មានការប្រើប្រាស់នូវជាតិពុល នៅក្រុងអាឡេប និងក្រុងហ៊ម ក្នុងប្រទេសស៊ីរី។ ដោយ ឡែក រដ្ឋាភិបាលស៊ីរីក៏បានចោទបក្សប្រឆាំងវិញដែរថា បានប្រើអាវុធគីមី នៅក្រុងអាឡេប កាលពីថ្ងៃ១៩មិនា កន្លងទៅ៕ដោយ ព្រំ សឿន សូលីណា (RFI)