ពលរដ្ឋរងគ្រោះក្នុងជម្លោះដីធ្លីគ្រោងតវ៉ានៅស្ថានទូតចិន
ប្រជាពលរដ្ឋ នៅតាមបណ្តាសហគន៍មួយចំនួន ដែលបាត់បង់ធ្លីស្រែចំការ និងលំនៅដ្ឋាន ដោយសារតែការវិនិយោគទុនរបស់ក្រុមហ៊ុនចិន នៅកម្ពុជា គ្រោងនឹងជួបជុំតវ៉ា និងដាក់ញ្ញាតិ នៅស្ថានទូតចិន ដើម្បីសុំអន្តរាគមន៍ពីលោកប្រធានាធិបតី។
តំណាង ប្រជាពលរដ្ឋមកពីឃុំជីខលើ និងជីខក្រោម ក្នុងស្រុកស្រែអំបិល ខេត្តកោះកុង ដែលបាត់បង់ដីធ្លីស្រែចំការ ដោយសារតែការអភិវឌ្ឍគ្មានតម្លាភាព របស់ក្រុមហ៊ុនចិន នៅពេលនេះ បានមកដល់រាជធានីភ្នំពេញ ហើយពួកគាត់ក៏បានមកចូលរួម នៅក្នុងវេទិកាប្រជាពលរដ្ឋ និងសង្គមស៊ីវិលអាស៊ានផងដែរ។
តំណាងប្រជាពលរដ្ឋនៅឃុំជីខលើ ស្រុកស្រែអំបិល បាននិយាយថា ពួកគាត់ ដែលបាត់បង់ដីស្រែចំការរាប់រយហិចតា ដោយសារតែក្រុមហ៊ុនចិន សហការជាមួយក្រុមហ៊ុនក្នុងស្រុក រឹបអូសយកដីរបស់ពួកគាត់ ទៅដាំអំពៅ សម្រាប់ផលិតស្ករស ឲ្យប្រជាកសិករទាំងនោះ គ្មានដីស្រែ ធ្វើកសិកម្ម ប៉ះពាល់ជីវភាពរស់នៅប្រចាំថ្ងៃ។
ដូច្នេះពួកគាត់ គ្រោងនឹងជួបជុំតវ៉ា និងដាក់ញត្តិនៅស្ថានទូតចិន ប្រចាំកម្ពុជា ក្នុងពេលប្រធានាធិបតីចិន បំពេញទស្សនកិច្ច នៅកម្ពុជា ចាប់ពីថ្ងៃទី៣០មីនា ដល់ថ្ងៃទី២មេសា ឆ្នាំ២០១២។
ដោយឡែកប្រជាពលរដ្ឋបឹងកក់ នៅរាជធានីភ្នំពេញ ដែលកើតមានជម្លោះដីធ្លីដ៏រ៉ាំរ៉ៃយូរឆ្នាំមកហើយ ពុំមានផែនការធ្វើការតវ៉ា នៅមុខស្ថានទូតចិនឡើយ។
លោកស្រី ធីតា ឃ្លឹះ នាយិកាអង្គការសីលការ បាននិយាយថា ការដែលប្រជាពលរដ្ឋមកពីស្រុកស្រែអំបិល ចង់ហែញត្តិ ដាក់ជូនលោកប្រធានាធិបតីចិន តាមរយៈស្ថានទូតចិន ក្នុងដំណើរទស្សនៈរបស់លោកប្រធានាធិបតីចិន មកកម្ពុជា ឲ្យជួយរកដំណោះស្រាយនោះ គឺដើម្បីបញ្ជូននូវព័ត៌មាននេះ ទៅដល់ដៃលោកប្រធានាធិបតីចិនតែម្តង។ ដើម្បីឲ្យគាត់ ដឹងពីសេចក្តីត្រូវការរបស់ពលរដ្ឋផ្ទាល់។ ខ្ញុំយល់ថា វាជាការងារមួយល្អ ពីព្រោះត្រូវការស្តាប់សំឡេងពីប្រជាពលរដ្ឋផងដែរ។
សូមបញ្ជាក់ថា នៅក្នុងដំណើរទស្សនៈកិច្ចរបស់លោក ប្រធានាធិបតីចិន មកកម្ពុជា នៅពេលនេះ គឺរាជរដ្ឋាភិបាល នឹងរៀបចំការពារសន្តិសុខយ៉ាងប្រយ័ត្នប្រយែងជាទីបំផុត និងមិនអនុញ្ញាតឲ្យមានការតវ៉ា តាមរំខានដល់ដំណើរទស្សនៈកិច្ចរយៈពេល ៤ ថ្ងៃនៅកម្ពុជា ចាប់ពីថ្ងៃទី៣០មីនា ដល់ថ្ងៃទី២មេសា ឆ្នាំ២០១២ ឡើយ៕