គណបក្សប្រឆាំងព្រមានធ្វើបាតុកម្មជាថ្មី
Cambodia News
ភ្នំពេញ៖ មន្ត្រីអ្នកនាំពាក្សគណបក្សប្រឆាំង បានបញ្ជាក់ថា ចំពោះ គ.ជ.ប មិនទទួលយកសំណើរបស់គណបក្សសង្គ្រោះជាតិទេនោះ គឺគណបក្សប្រឆាំង នឹងចាប់ផ្តើមធ្វើបាតុកម្មសាជាថ្មី ក្នុងពេលឆាប់ៗខាងមុខនេះ។
កាលពីព្រឹកថ្ងៃទី២៦ ខែមេសានេះលោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានមានថ្លែងថា បញ្ហាសំខាន់បាត់ឈ្មោះប្រជាពលរដ្ឋ ១លាន ៥សែននាក់ នេះជាការរំលោភរដ្ឋធម្មនុញ្ញ រំលោភសិទ្ធិប្រជាពលរដ្ឋ ដែលគ.ជ.ប ត្រូវតែទទួលខុសត្រវ។
លោក យឹម សុវណ្ណ បានលើកឡើងថា គណបក្សសង្គ្រោះជាតិ នៅតែស្នើសុំឲ្យធ្វើបញ្ជីបោះឆ្នោតថ្មី ដើម្បីប្រជាពលរដ្ឋជាង ១លាននាក់ មានសិទ្ធិបោះឆ្នោត និងត្រូវតែផ្លាស់ប្តូរសមាសភាព គ.ជ.ប ពីព្រោះបើទុកសមត្ថភាពបែបនេះមានន័យថា ការបោះឆ្នោត មិនអាចប្រព្រឹត្តទៅដោយសេរី និងយុត្តិធម៌ទេ។
បើតាម គ.ជ.ប សំណើមួយចំនួន ក្នុងរបាយការណ៍របស់អ្នករាយការណ៍ពិសេសរបស់អង្គការសហប្រជាជាតិ និងអង្គការសង្កេតការណ៍បោះឆ្នោតជាតិ និងអន្តរជាតិ ដែលគណបក្សប្រឆាំង បានលើកឡើង គឺសុទ្ធតែគ.ជ.ប. បានទទួលយកមកកែលម្អ ក្នុងបទបញ្ជា និងនីតិវិធី សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៥ រួចហើយ។
ចំពោះករណីបក្សប្រឆាំង ស្នើឲ្យធ្វើបញ្ជីបោះឆ្នោតជាថ្មីឡើងវិញ និងការស្នើសុំពន្យារពេលបោះឆ្នោតនោះ ត្រូវបាន គ.ជ.ប បញ្ជាក់ទៅកាន់បក្សប្រឆាំងវិញហើយថា ជាសំណើមិនអាចទទួលយកបានទេ ៕
