ពួកអ្នកដើរកប៉ាល់ជាតិរុស្ស៊ីឃាត់ខ្លួនដោយកងល្បាតដែនទឹកជប៉ុន
អ្វីដែលគួរឲ្យចាប់អារម្មណ៍ គឺជាតិរុស្ស៊ីទាំងនោះ សរុបទៅមានគ្នា១៥នាក់ ធ្វើការស៊ីឈ្នួលនេសាទជលផលគឺដោយប្រើកប៉ាល់នេសាទដែលដោតទង់ជាតិ កម្ពុជាតែម្តង។ ការឃាត់ខ្លួននេះបានប្រព្រឹត្តទៅព្រឹកមិញ ដោយមកពីកប៉ាល់នោះ បាននេសាទក្តាមសមុទ្រដោយខុស ច្បាប់ នៅត្រង់តំបន់សេដ្ឋកិច្ចរបស់ជប៉ុន ជាប់នឹងកោះជប៉ុន Hokkaido។
ដំណឹងស្តីអំពីការឃាត់ខ្លួនព្រឹកមិញនេះ ផ្សាយដោយទីភ្នាក់ងារព័ត៌មានផ្លូវការរុស្ស៊ី ITAR-TASS យោងទៅលើស្ថានអគ្គកុងស៊ុលរុស្ស៊ីប្រចាំនៅក្រុងជប៉ុន Sapporo ជាធានីកោះ Hokkaido។ ព័ត៌មាននេះក៏ត្រូវបានផ្សាយព្រឹកមិញដោយកាណាល់ទូរទស្សន៍រដ្ឋរុស្ស៊ី Vesti។
គឺស្ថានអគ្គកុងស៊ុលរុស្ស៊ីនេះ ដែលបានទទួលពីភាគីជប៉ុននូវវិញ្ញត្តិជាលាយលក្ខណ៍អក្សរ ជូនដំណឹងថា៖
ព្រឹកថ្ងៃ២៤ មេសានេះ កងល្បាតព្រំដែនសមុទ្រជប៉ុនបានឃាត់ខ្លួនមនុស្ស១៥នាក់ ដែលសុទ្ធតែជាពលរដ្ឋនៃសហព័ន្ធរុស្ស៊ី នៅក្នុងកប៉ាល់នេសាទមួយដោតដោយទង់ជាតិកម្ពុជា ឃាត់នេះគឺចំពោះការនេសាទក្តាមសមុទ្រដោយខុសច្បាប់ នៅត្រង់តំបន់សេដ្ឋកិច្ចជាដែនទឹកជប៉ុនសុទ្ធ សាធ នៅក្បែរកោះ Hokkaido ជាកោះប៉ែកខាងជើងបង្អស់របស់ជប៉ុន។
ឥឡូវជនរុស្ស៊ីទាំងនេះ ត្រូវឃាត់ខ្លួនឲ្យស្ថិតនៅសិន ក្នុងក្រុងផែជប៉ុន Mombetsu។ ភាគីជប៉ុននៅមិនទាន់ធ្វើការចោទប្រកាន់ជាផ្លូវការទៅលើអ្នកទាំងនោះ ឡើយ ដ្បិតតាមធម្មតាអាជ្ញាធរជប៉ុនមានពេលដល់ទៅ៤៨ម៉ោង សម្រាប់ធ្វើការចោទប្រកាន់នេះ។
លើកមុន ឧប្បត្តិហេតុបែបនេះក្នុងដែនទឹកជប៉ុន ត្រូវបានកត់ត្រាឃើញកាលពីចុងឆ្នាំ២០១១។ កាល ណោះ កងល្បាតព្រំដែនសមុទ្រជប៉ុនក៏បានឃាត់ខ្លួនក្រុមអ្នកដើរកប៉ាល់ជាតិ រុស្ស៊ីដែរ ដោយកប៉ាល់គេបាននេសាទក្តាមសមុទ្រដោយខុសច្បាប់ នៅត្រង់តំបន់សេដ្ឋកិច្ចជប៉ុន។ បន្ទាប់មក តុលាការជប៉ុនបានវិនិច្ឆ័យឲ្យមេក្រុមអ្នកដើរកប៉ាល់ជាតិរុស្ស៊ីនោះ បង់ប្រាក់ពិន័យទំហំ ២លានយ៉េន រឺប្រមាណ ២ម៉ឺនដុល្លារអាមេរិក។
បើនិយាយពីកប៉ាល់នេសាទដោតដោយទង់ជាតិកម្ពុជានោះ ឧស្សាហ៏កើតមានឡើងករណីកាលដែលកប៉ាល់នេះមានថៅកែជាក្រុមហ៊ុនរុស្ស៊ី ទេតើ តែងត្រូវបានកងល្បាតព្រំដែនរុស្ស៊ីឃាត់ខ្លួនជាញឹកញយ ចំពោះការនេសាទក្តាមសមុទ្រខុសច្បាប់ នៅត្រង់តំបន់សេដ្ឋកិច្ចរបស់រុស្ស៊ី។ ដំណឹងបែបនេះ ពីមួយពេលទៅមួយពេល តែងផ្សាយដោយទូរទស្សន៍រដ្ឋរុស្ស៊ី។
ដោយហេតុថា ទាំងជប៉ុន ទាំងរុស្ស៊ី សុទ្ធតែរងគ្រោះនឹងការនេសាទជលផលដោយខុសច្បាប់ ក្នុងដែនទឹកខ្លួន បានជាកាលពីខែកញ្ញា ឆ្នាំ២០១២ ក្រុងម៉ូស្គូនិងតូក្យូបានចុះនឹងគ្នាសន្ធិ សញ្ញាស្តីអំពីការ ប្រយុទ្ធរួមគ្នាទល់នឹងការនេសាទដោយលួចលាក់ គ្រាន់នឹងបញ្ចៀសឲ្យផុតពីការនេសាទ និងការជួញជលផលនេះដោយខុសច្បាប់ នៅតាមតំបន់ឆ្នេរមហាសមុទ្រប៉ាស៊ីហ្វិក មានក្តាមសមុទ្រជាដើម។ ក្តាមសមុទ្រនេះមានមាឌធំៗណាស់ ប្រវែង៣តឹក ៤តឹក៕ដោយ កែវ ឆាយា (RFI)