តូចចិត្តក្រ និងចាញ់បោកមេខ្យល់រត់ចូលរថយន្តសម្លាប់ខ្លួន
Cambodia News
បន្ទាយមានជ័យ៖ កាលពីវេលាម៉ោង ៥ និង ៥០នាទីល្ងាចថ្ងៃទី២៣ ខែមេសា ពលករចំណាកស្រុកម្នាក់ តូចចិត្តខ្លួនក្រ និងចាញ់បោកមេខ្យល់ពេលមកដល់ដីខ្មែរ បានព្យាយាមធ្វើអត្តឃាតចំនួន២ដង ដោយចុងក្រោយជននោះ បានរត់ចូលរថយន្តយីឌុបបណ្ដាលឲ្យ ស្លាប់ភ្លាមៗនៅ នឹងកន្លែងកើតហេតុ នៅចំណុចលើផ្លូវជាតិលេខ៦ ត្រង់ម្ដុំភូមិ-សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ។
ជនរងគ្រោះឈ្មោះ ម៉ម ភឿន អាយុ៣៥ឆ្នាំ រស់នៅភូមិខ្លាធំ ឃុំកំពង់ក្ដី ស្រុកជីក្រែង ខេត្តសៀមរាប មានមុខរបរជាកសិករ ហើយបានចំណាកស្រុកអស់រយៈពេល៥ថ្ងៃតាមច្រករបៀងប៉ែកខាងត្បូង ក្រុងប៉ោយប៉ែត។ រហូតដល់ម៉ោង១០និង១៥នាទី ព្រឹកថ្ងៃទី២៣ ខែមេសា ឆ្នាំ២០១៣ គេ ឃើញជនរងគ្រោះបានវិលពីប្រទេសថៃ រួចលួចចង.កសម្លាប់ខ្លួនម្ដងរួចមកហើយ តែមិនបានសម្រេច ដោយភ្លាមៗនោះ ត្រូវបាន អ្នកស្រុកនៅម្ដុំវត្តម៉ុងចិនក្រុងប៉ោយប៉ែត បានជួយសង្គ្រោះទាន់ ។
តាមការរៀបរាប់របស់ជនរងគ្រោះនាពេលនោះបានឲ្យដឹងថា ខ្លួនចង់សម្លាប់ខ្លួនដោយសារគ្មានលុយវិលទៅផ្ទះវិញ ព្រោះមេខ្យល់បោកយកលុយអស់ចំនួនជាង១ពាន់បាត នៅក្នុងទឹកដីថៃនាពេល កន្លងមក។
ចុងក្រោយជនរងគ្រោះ អង្គុយផឹកស្រាស ក្បែរផ្លូវជាតិលេខ៦ ស្ថិតនៅក្នុងក្រុងសិរីសោភ័ណ ហើយ មួយសន្ទុះក្រោយមកមានរថយន្តម៉ាកយីឌុបបើកក្នុងល្បឿនលឿន ពីកើតទៅលិច ស្រាប់តែជនរងគ្រោះ បានរត់សំដៅទៅពីមុខរថយន្ត ហើយត្រូវកង់រថយន្តកិនចំកណ្ដាលខ្លួនដាច់ជា២ស្លាប់តែម្ដង៕
