សមត្ថកិច្ចចាប់ខ្លួនចោរខ្ទើយបានម្នាក់ បន្តាប់ពីធ្វើសកម្មភាពឆក់ទូរស័ព្ទដៃជនជាតិបរទេស
Cambodia News
ភ្នំពេញ៖ កាលពីវេលាម៉ោង ២៤និង៣០នាទីរំលងអាធ្រាត្រ ឈានចូលថ្ងៃទី២៥ ខែមេសា ជនខ្ទើយម្នាក់ក្នុងចំណោមបក្សពួក២នាក់ ត្រូវបានសមត្ថកិច្ច ចាប់បាននៅចំណុចក្បែរស្ពានហង្សកោះពេជ្រ ស្ថិតក្នុងសង្កាត់ទន្លេបាសាក់ ខណ្ឌចំការមន បន្ទាប់ពីជនម្នាក់នេះនិងបក្សពួកម្នាក់ទៀត ជិះម៉ូតូ ឆក់ទូរស័ព្ទដៃជនបរទេសនៅចំណុចផ្លូវលេខ៣១០ សង្កាត់បឹងកេងកងទី៣ ខណ្ឌចំការមន។
ជនដែលសមត្ថកិច្ចឃាត់ខ្លួនខាងលើនេះឈ្មោះ យី វណ្ណារ៉ា អាយុ២២ឆ្នាំ ស្នាក់នៅសង្កាត់ចាក់អង្រែក្រោម ខណ្ឌមានជ័យ ជាអ្នកបើកម៉ូតូ ចំណែកឯម្នាក់ទៀតរត់គេចខ្លួនបាត់ មិនត្រូវបានស្គាល់អត្តសញ្ញាណឡើយ។
នៅចំពោះមុខសមត្ថកិច្ចជនខាងលើបានឆ្លើយសារភាពថា រូបគេគ្មានកំហុសអ្វីឡើយ ទោះជាយ៉ាងនេះ ក៏សមត្ថកិច្ចសម្រេចកសាងសំណុំរឿងបញ្ជូនខ្លួនទៅអធិការដ្ឋាននគរបាលខណ្ឌ ដើម្បីចាត់ការបន្តតាមផ្លូវច្បាប់៕ ហេង នាង
