ដោយសារអ្នកជំនាន់ក្រោយកាន់តែល្បី នាយកុយនិងនាយក្រឹមនាំគ្នាគិតគូរឡើងវិញ
Cambodia News
ព័ត៌មានកម្សាន
ភ្នំពេញ៖ កំពូលតារាកំប្លែងដែលមានឈ្មោះបោះសម្លេងក្នុងប្រទេសកម្ពុជាមកជាយូរឆ្នាំគឺលោកជួង ជី ហៅកុយ និងលោក អ៊ូ ប៊ុនរ៉ាត់ ហៅក្រឹម បានបង្ហាញវត្តមានសម្តែងរួមគ្នាជាថ្មីនៅក្នុងឆាកតន្ត្រីដ៏ធំដែលមានឈ្មោះថា អង្គរសង្ក្រាន ដែលរៀបចំឡើងដោយសហភាពសហព័ន្ធចលនាយុវជនកម្ពុជា ។
ការបង្ហាញវត្តមានសម្តែងរួមគ្នាជាថ្មីរបស់កំពូកតារាកំប្លែងចាស់វស្សាទាំងពីរនេះ គឺក្រោយពេលដែលអ្នកទាំងពីរបានខកខានមិនបានសម្តែងរួមគ្នាអស់រយះពេលជិត១០ចុងក្រោយនេះ ក្រោមពាក្យចចាមអារាមថា អ្នកទាំងពីរបានមានទំនាស់ជាមួយគ្នាទើបបណ្តាលឲ្យមានហែកចែកក្រុមគ្នាសម្តែងដូច្នេះ។ យ៉ាងណាក៍ដោយបើទោះបីជាតារាកំប្លែងទាំងពីរនេះបានផ្តាច់ខ្លួនមិនព្រមសម្តែងរួមគ្នាយ៉ាងណាក៍ដោយ រហូតមកដល់នាពេលនេះកេរឈ្មោះក្នុងវិថីសិល្បះកំប្លែងរបស់ពួកគេនៅតែឈរក្នុងលំដាប់កំពូលដដែល។
ទន្ទឹមនឹងការកសាងកេរឈ្មោះក្នុងពិភពសិល្បះកំប្លែងក្នុងក្រុមផ្សេងគ្នានេះ តែសម្រាប់ទស្សនិកជនភាគច្រើនក៍នៅតែមានការទន្ទឹងរង់ចាំអំពីវត្តមានរបស់តារាកំប្លែងទាំងពីរក្នុងការសម្តែងរួមគ្នាដដែល។យ៉ាងណាក៍ដោយការទន្ទឹងរង់ចាំរបស់ទស្សនិកទាំងនោះមិនបានចេញជារូបរាងឡើយ ខណះពេលដែលតារាកំប្លែងទាំងពីរដួងនេះនៅតែមិនអាចបញ្ជៀបចូលគ្នាសម្តែងរួមគ្នាជាថ្មីឡើយ បើទោះបីជាពេលខ្លះពួកគេទាំងពីរនេះមានឱកាសសម្តែងក្នុងឆាកតន្ត្រីតែមួយនិងក្នុងពេលតែមួយដូចគ្នាក៍ដោយ។
ទើបតែពេលនេះវត្តមានរបស់ពួកគេបានបង្ហាញមុខសម្តែងរួមគ្នាជាថ្មី ដែលធ្វើឲ្យទស្សនិកជនមានការចាប់អារម្មណ៍ថា កំពូលតារាកំប្លែងទាំងពីរនេះអាចនឹងចាប់ដៃគ្នាជាថ្មីឡើងវិញដើម្បីទាក់ទាញការគាំទ្រពីទស្សនិកជនឲ្យកាន់តែច្រើន ខណះពេលដែលក្រុមកំប្លែងជើងថ្មីគឺក្រុមនាយពាក់មីកំពុងតែឡើងកូដនោះ។
ការបង្ហាញវត្តមានសម្តែងរួមគ្នាជាថ្មីនាពេលនេះត្រូវបានតារាកំប្លែងមាឌល្អិតលោក អ៊ូ ប៊ុនរ៉ាត់ ហៅក្រឹមបានអះអាងប្រាប់កោះសន្តិភាពតាមទូរស័ព្ទថា តាមពិតទៅលោក និងនាយកុយខកខានមិនបានសម្តែងរួមគ្នាមកនេះមិនមែនឈរលើមូលហេតុនៃការទំនាស់គ្នាណាមួយនោះឡើយ ពោលគឺលោកនិងនាយកុយនៅតែរាប់អានគ្នាជាធម្មតា។តារាកំប្លែងដែលមានកាយវិកាក្រម៉ិចក្រមើមរូបនេះបន្តថា ការបង្ហាញខ្លួនរួមគ្នានាពេលនេះគឺជាស្នើសុំរបស់ក្រុមសហភាពសហព័ន្ធយុវជនកម្ពុជា ដែលដឹកនាំដោយលោក ហ៊ុន ម៉ានី ដើម្បីសម្តែងក្នុងឱកាសអបអរបុណ្យចូលឆ្នាំប្រពៃណីខ្មែរ។លោកបញ្ជាក់ថា ការសម្តែងនាពេលនេះមិនត្រឹមតែអបអរបុណ្យចូលឆ្នាំខ្មែរប៉ុណ្ណោះទេ តែវាក៍ជាការទាក់ទាញភ្ញៀវទេសចរឲ្យមកទស្សនាប្រទេសកម្ពុជាឲ្យកាន់តែច្រើនថែមទៀតផងដែរ។ ទោះជាយ៉ាងណាតារាកំប្លែងរូបនេះបានអះអាងបន្ថែមថា លោកនិងនាយកុយ ក៍មានគម្រោងសម្តែងរួមគ្នាជាបន្តទៀតផងដែរ ប្រសិនបើមានការស្នើសុំពីអ្នករៀបចំកម្មវិធី និងដើម្បីបំរើអារម្មណ៍ទស្សនិកជនឲ្យមានការសើចសប្បាយរីករាយ។
ដោយឡែកតារាកំប្លែងចាស់វស្សាក្បាលទំពែក លោក ជួង ជី ហៅកុយ ក៍បានអះអាងស្រដៀងគ្នានេះដែរថា នេះជាការសម្តែងរួមគ្នាជាថ្មីរវាងលោកនិងនាយក្រឹម ក្រោយពីបានខកខានជិត១០ឆ្នាំមកនេះ។ លោកបញ្ជាក់ថា ការសម្តែងរួមគ្នាជាថ្មីនេះគឺជាការស្នើសុំរបស់ក្រុមសហព័ន្ធសហភាពយុវជនកម្ពុជា ដែលដឹកនាំដោយលោក ហ៊ុន ម៉ានី ក្នុងកម្មវិធីអង្គរសង្ក្រាន ដែលរៀបចំធ្វើនៅក្នុងខេត្តសៀមរាប ដើម្បីអបអរបុណ្យចូលឆ្នាំថ្មី។
ទោះជាយ៉ាងណាតារាកំប្លែងមិនចេះរីងស្ងួតរូបនេះនៅតែអះអាងថា ការខកខានមិនបានសម្តែងរួមគ្នារវាងលោកនិងនាយក្រឹមអស់រយះពេលជាច្រើនឆ្នាំមកនេះគឺមិនមែនមកពីមានទំនាស់ជាមួយគ្នាដូចការលេចលឺនោះឡើយ។
ត្រង់ចំណុចនេះនាយកុយបានបញ្ជាក់ថា បច្ចុប្បន្នមានស្ថានីយទូរទស្សន៍ច្រើន ហើយស្ទើរតែគ្រប់ស្ថានីយទូរទស្សន៍ទាំងអស់សុទ្ធតែមានតម្រូវការក្នុងការសម្តែងកំប្លែង ហេតុនេះលោកនិងនាយក្រឹមបានសម្រេចចិត្តបង្កើតក្រុមកំប្លែងដាច់ដោយឡែករៀងៗខ្លួន ដើម្បីបំពេញបំណងរបស់ទស្សនិកជន និងម្យ៉ាងដើម្បីផ្តល់ឱកាសដល់តារាកំប្លែងជើងចាស់ ជើងថ្មីមួយចំនួនបានសម្តែងផងដែរ។
លោកបន្ថែមថា លោកនិងនាយក្រឹមអាចសម្តែងរួមគ្នានៅពេលណាមួយក៍បានអាស្រ័យលើអ្នករៀបចំកម្មវិធី និងការចចារទៅលើតម្លៃ ព្រោះបណ្តាលស្ថានីយទូរទស្សន៍មួយចំនួនគឺគេមិនហ៊ានឲ្យតម្លៃខ្ពស់ក្នុងការឲ្យលោកនិងនាយក្រឹមសម្តែងរួមគ្នាឡើយ។នាយកុយនិយាយថា ជាធម្មតាប្រសិនបើលោក និងនាយក្រឹមសម្តែងរួមគ្នានោះគឺទាមទារក្នុងតម្លៃមួយខ្ពស់ ព្រោះពេលសម្តែងម្តងនាយក្រឹមមិនអាចយកពីលោកត្រឹមតែ២០ទៅ៣០ដុល្លារបានទេ ហើយរួមលោកក៍ដូចគ្នាមិនអាចទៅយកលុយពីនាយក្រឹមត្រឹមប៉ុណ្នឹងបាននោះដែរ។
ហេតុនេះចង់មិនចង់គឺលោកត្រូវបង្កើតក្រុមដាច់ដោយឡែករៀងៗខ្លួន ដើម្បីងាយស្រួលក្នុងការទទួលយកតម្លៃក្នុងការចេញសម្តែង។ទោះជាយ៉ាងណាការសម្តែងរួមគ្នារវាងលោកនិងនាយក្រឹមមិនមែនធ្វើឡើងតែនៅក្នុងពេលនេះនោះទេ ពោលគឺអាចនឹងមានការសម្តែងរបៀបនេះជាបន្តបន្ទាប់ទៀត៕ ស.រ