លោក ហោ ណាំហុង៖ ថៃកំពុងតែបង្ហាញអាកប្បកិរិយា ក្រអឺតក្រទម
Cambodia News
ភ្នំពេញ៖ នៅក្នុងបទសម្ភាសន៍ដល់បណ្តាញសារព័ត៌មានជាច្រើននៅក្នុងរាជធានីភ្នំពេញ នៅព្រឹកថ្ងៃទី២២ ខែមេសានេះ លោកឧបនាយករដ្ឋមន្ត្រី ហោ ណាំហុង បាននិយាយថា «ក្នុងមួយសប្តាហ៍កន្លងទៅនេះ យើងបានតស៊ូជាមួយថៃ អំពីបញ្ហាតំបន់ជុំវិញប្រាសាទព្រះវិហារ ហើយមិនមែនបញ្ហាប្រាសាទព្រះវិហារទេ។បញ្ហាប្រាសាទព្រះវិហារ ថៃទទួលស្គាល់ថាជារបស់កម្ពុជាហើយ» ។
លោកឧបនាយករដ្ឋមន្ត្រី បន្តថា «បញ្ហាគឺនៅត្រង់តំបន់ជុំវិញប្រាសាទព្រះវិហារ ហើយកម្ពុជាបានស្នើសុំឲ្យតុលាការអន្តរជាតិ ធ្វើការបកស្រាយលក្ខខណ្ឌដែលតុលាការបកស្រាយវិសាលភាព នៃសាលក្រម ឆ្នាំ១៩៦២។ ប៉ុន្មានថៃ្ងក្រោយពីសាលក្រមខែមិថុនា ឆ្នាំ១៩៦២ ថៃបានធ្វើរបងខ្សែលួសមុខប្រាសាទព្រះវិហារ ដែលនៅប៉ុន្មានម៉ែត្រមុខប្រាសាទនេះ ជាអំពើធ្វើឯកតោភាគីមិនស្របច្បាប់របស់ថៃ »។
លោកឧបនាយករដ្ឋមន្ត្រី បានបញ្ជាក់ទៀតថា ” ការតទល់គ្នារវាងកម្ពុជានិងថៃ នៅតុលាការយុត្តិធម៌អន្តរជាតិក្រុងឡាអេ អាកប្បកិរិយារបស់ថៃ បានបង្ហាញនូវភាពក្រឡេចក្រឡុច ហើយបានយកផែនទីទឹកមកនិយាយដដែលៗ បានធ្វើការមួលបង្កាច់មកលើកម្ពុជា ប៉ុន្តែកម្ពុជាបន្តរក្សានូវភាពស្ងៀមស្ងាត់របស់ខ្លួន ខណៈពេលដែលភាគីថៃកំពុងតែបង្ហាញអាកប្បកិរិយាក្រអឺតក្រទម៕
